قمت زعلت خااااااااالص

Posted: 02/08/2006 in Uncategorized


من كام سنة أيام الجامعة سمعت عن مذبحة قانا الاولى
والتلفزيون هرانا صور مريعة تقطع القلب
وبعدين الصراع الفلسطيني الاسرائيلي
وقصف المخيمات وقتل المدنيين كل يوم
وجنين كلاكيت 20 مرة
وقنابل غزة ليل ونهار
القدس مدينة السماء
مدينة الرب
اقدس بقاع الارض
تترك خرابا
والقضية الفلسطينية تاخد ربع ساعة بحالها من نشرة الاخبار كل يوم
والمسلسل يتأخر لو فيه اخبار عاجلة
و50 قمة عربية
الانتفاضة الاولى والتانية
طييييب
بعد قتل محمد الدرة ..
انا زعلت جدا بصراحة
اتضايقت خالص
وقلت لازم اعمل حاجة
ماينفعش الصمت والسكوت ابدا ابدا ابدا
وبعديييييييين
قمنا ضربنا مظاهرة شديدة خالص في الجامعة
“تسقط تسقط إسرائيل .. إلى الجحيم يا باراك .. يا نتنياهو .. يا شارون
وكمان كتبنا كام مقال جامدين جدا
وبعديييييييين
صحينا الصبح لقينا أمريكا دخلت العراق
؟؟؟؟؟؟؟؟؟؟؟
كده من غير ما تقول لحد …
لا حول ولا قوة إلا بالله ..
انا برضك زعلت واكتئبت وكتبت كلااااااام كتيييييييييييير
مقالات مقالات مقالات
وكلام قوي جدا والنعمة ..
بصراحة الواحد مش لازم يسكت على المهزلة دي لازم نعمل حاجة
5 مظاهرات جامدين جدا جدا
الشيطان بوش .. الحيوان رامسفيلد
الافعي كوندي
احنا مش هانسكت
الواحد كان زعلان جدا جدا خالص
وبعدييييييييين قصف بيروت
يا نهار اسود
ست الدنيا
يا حراااااااااااااااام
الناس بيموتوا
نساء واطفال
مدنييين
دي اسرائيل دي وحشة وبنت كلب .. الله يحرقها
ربنا هيورينا فيهم يوم .. هيييييييه .. دنيا وحشة قوي
الواحد مكتئب جدا
زعلان خاااااااااالص
متضايق
ماليش نفس اسهر مع اصحابي خالص
ولا حتى اصحابي المناضلين
الواحد متضايق
مش لازم نسكت .. احنا هنملى الدنيا كلام
مقالات مقالات مقالات مقالات
جرايد مجلات ومدونات
صور اطفال وكبار وموتى وجرحى وصواريخ وطوب
وضرب وزعماء اونطة الكبشة بربع جنيه
كلام كلام كلام
نصر الله حلو
نصر الله وحش
نصر الله نو
نصر الله يييييييييس
اسرائيل ومليون سطر شتيمة ودعوات
و3 مظاهرات صغيرين على القد كده
معلش الجو حر والناس بتصيف
بس المهم اننا مسكتناش
احنا هزينا العالم العربي كله
احنا زلزلنا اسرائيل
الامم المتحدة مش ممكن تتحمل قوة حملتنا
واسرائيل بدأت تنزعج من قوة حماسنا واقلامنا المبرية
مش قلتلكوا
انا كنت زعلانة جدا جدا جدا
ومتضايقة خااااااااالص
وكان لازم اعمل حاجة
وبعدييييييييين
قبل ما اخلص المقال الحماسي اللوذعي النضالي ده
خرج صوت الشحرورة من الراديو بأغنيتها الشهيرة الفزيعة خاااااالص
كلام كلام وبس … مابخدش منكم غير كلام وبس
PS: الشحرورة من مواليد جبل لبنان
Comments
  1. lastknight says:

    من تعليقك على فى موضوعك السابق .. نوبة الهيافه قد تكون مناوره نفسيه لحماية عقلك من أنه بضرب خااالص .. يعنى لما الجد يبقى كله نكد … أحيانا الواحد بيستخبى فى شوية هيافه
    يعنى مش عيب ..كلنا بنعمل كده ساعات
    مش عارف أعلق على موضوعك الجيدد .. لكن سؤالى هو .. شربتى أيه قبل ماتكتبي الكلام ده ؟ عاوز اعرف عشان افلسع بدماغى أنا كمان قبل ماتضرب خاااالص

  2. bluestone says:

    المشكلة الحقيقية اني مش عارفة اطلع من النوبة دي بقالي مدة ..
    وواضح انها يمكن تطول
    والاخطر اني مبسوطة ..
    كل ما احاول اخرج منها ألاقي براها اسود قوي وكل الاخبار زي الزفت .. مزيج من الاحباط والموت والسود والحرب والدم …. إلخ .. ووراها كل المفردات اللي تجيب المرض والهم ..

    انما الهيافة ..
    يا روحي على الهيافة ..
    منتهي السعادة..
    وبلا هدف
    كما لو انك محصن ضد كل الانباء السيئة والاحباطات والموت المرابض في الجوار ..

    اما التدوينة اللي فاتت ..

    دي كانت إرهاصة احباط خفيف

    والنعمة ما شربت اي حاجة
    انا اصلا ماليش في السكة دي
    هي دماغي عالية اليومين دول لوحدها
    عاملة دماغ هيافة معتبرة ,,,

    واعتقد انها هتكون روشتة ونصيحة لكل الاصدقاء .. لانها جايبة نتيجة هايلة

    وبما ان الواقع بهذا العبث
    ايه فايدة التعقل

    احد المفكرين المسيحيين الاوائل كانت له كلمة مشهورة جدا تقول

    “كلما ازددت علما ازددت هما” ..

    يالا ما علينا ..
    انا منتظرة فيلم كتكوت بفارغ الصبر

  3. lastknight says:

    كتبت موضوع من وحى مدونتك
    و فى الشعر العربى بيت بيقول
    وصاحب العقل يشقى فى النعيم بعقله
    و أخو الجهالة فى الشقاوة ينعم
    أقرى موضوع و علقى عليه .. و ياريت تحجزيلى معاكى فى فيلم كتكوت ..

  4. Abdou Basha says:

    عارفة يا بلوستون
    نفسي في يوم نسميه يوم الصمت، أو الخرس..
    عشان الناس تجرب متتكلمش غير عند الضرورة، يمكن مع الصمت نعرف نفكر أو نضظر إننا نشتغل.
    **
    احنا بنتكلم كتيييييييييير
    وبنزعق أكتر
    يمكن لو الواحد اتخرس يلاقي نفسه مضطر يفكر.
    **
    كتكوت قادم قريبا🙂

  5. منار منجد says:

    ممتاز، مقال في وقته تمام
    لأنه كان نفسي حد يسكتني.. يضربني على خلقتي مثلاً: سدّي بوزك يامنار
    عشان هيكون أشرف لي كتير، بدل اللي انا فيه دلوقت..بين اللي مش عارفة اعمله، واللي نفسي اعمله، والكلام المستهلك كالعادة 🙂

    إيه حكاية فيلم كتكوت دي؟

  6. bluestone says:

    المشكلة يا عبده ياخويا🙂
    مش في الكلام في حد ذاته المشكلة في اننا بنفضل نتكلم نتكلم نتكلم .. ومابنعملش حاجة غير الكلام

    يعني مفهوم انه يكون اول رد فعل لاي حدث كلام .. ماشي .. لكن بعد كده فعل
    انما كل اللي بنعمله كلام وبس

    حتى لما قررنا نقوم بفعل (مظاهرة) برضه هنهتف يعني هنتكلم وبس ..

    وعشان الاخوة المتظاهرين المناضلين مايزعلوش مني .. التظاهر كويس وكل حاجة بس التظاهر تعبير عن رأي مش فعل

    يعني في بلدنا وفي عالمنا العربي التظاهر لا جدوى له (ده ان سمح به اصلا)
    يعني مثلا في أوروبا والدول المتقدمة (على راي شخصية في فيلم لعادل امام) المظاهرات ليها هدف ليها لزمة .. يعني ممكن الحكومة تغير رأيها بسبب الضغط الشعبي مثلا .. ده ممكن يكون نوع من انواع الفعل
    او ان الحكومة تعدل عن قانون او قرار او حتى تستقيل بسبب حملة صحفية قوية جدا مثلا

    ده يبقى اسمه فعل زي ما حصل في فرنسا في قانون العمل

    لكن في وطني حبيبي الوطن الاغبر آخرة التظاهر ايه ؟؟؟
    عملنا ايه يعني ؟؟ اسرائيل بطلت تقتل الاطفال في لبنان .. بطلت قصف ..
    الحكومة خدت أي موقف من اي نوع ولو حتى موقف كوبا او فنزويلا

    لازم الواحد يقيم اي عمل قبل ما يعمله .. مش نعمله والسلام ..
    وبعد كده يطلعوا في المدونات يحكوا عن المظاهرات زي ما يكون حروب وفتوحات كبرى ..
    والعيل من دول يقولك الطريق اللي انا اخترته لنفسي …

    طيب يا عم الطريق .. كسبنا صلاة النبي

    لبنان كسبت ايه بقى ؟؟؟

    فيه حلول مش احسن حاجة لكن اضعف الايمان اسمها تبرع ..
    او حتى بعد انتهاء الحرب ان شاء الله لو الصليب الاحمر فتح باب التطوع لاعادة الاعمار .. او لاي جهود تطوعية من النوع ده ..
    لكن غير كده .. كلام على الفاضي

    انا في انتظار الكتكوت أو الصليب الاحمر

    تحياتي

  7. bluestone says:

    صاحبة المفاجئات الحلوة .. منار
    المشكلة ان الكلام كتير جدا بيبقى مالوش فايده .. وبيتحول لنزيف يحرق اعصابنا ويصيبنا بكل الامراض والاحباطات

    وساعتها بيبقى الكلام خسارة مش فايده ابدا

    اما حكاية كتكوت دي .. فدي حكاية طويلة جدا ..
    كتكوت طبعا هو فيلم الفنان الكبير صاحب الرسالة الفنية الهادفة محمد سعد أو (اللمبي) ..
    ولمحمد سعد معي حكاية طويلة .. وهي اني منذ ظهور شخصية اللمبي في فيلم الناظر بتاع علاء ولي الدين وقد اصبح اللمبي عندي علاج للاكتئاب والتفكير وعلاج للكتابة كمان

    كلما اصبت بنوبة حزن او احباط او ملل او مجرد شجن عابر از حتى نوبة تفكير عميق تصيب رأسي بالصداع اسرع لمشاهدة احد افلامه .. لاني حينما اشاهده اتوقف تماما عن التفكير وبعمل لمخي (SHUT DOWN(
    واتفرغ للضحك بهيستريا .. لا ادري سببها .. حتى إذا شاهدت الفيلم عشرات المرات ..

    إيه حكاية فيلم كتكوت دي؟

  8. إسلامي says:

    عارفة يا بلوستون

    انا من ساعة ما حصل اللي حصل وانا ساكتة ومبتكلمش في الموضوع ده نهائي.. ولا كتبت عليها كلمة ولا رديت على اي حاجة مكتوبة بخصوصها..

    باتفرج وباتابع .. لكن حاسة ان فعلا أي كلام حقوله من غير أفعال حيبقى مجرد سخف.. ويبقى الصمت أكرم!!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s