>هو ضحك كالبكاء …الله يحرقكم جميعا

Posted: 29/01/2007 in Uncategorized

>

الله يخرب بيوتكم يا بعدا (بضم البااااااااااء)ه
يعني الواحد يبطل يقرا جرايد ولا يعمل ايه بالظبط
ما هو للاسف الشديدما ينفعش ابطل اقرا جرايد …ماشتغلش
بس واضح ان ده الحل الوحيد للخزعبلات اللي تحرق الدم وتجيب المرارة دي كل يوم على الصبح
خد عندك عينة من الهراء اليومي :ه
وكيل لجنة الدفاع والامن القومي (انعم واكرم) بيقول ايه بقى الحاج الكبارة دة
الراجل بيتهم الاخوان بالوقوف وراء جرائم السفاح في تصريحاته للمصري اليوم وبرنامج 90 دقيقة (فقيعة) على المحور
ليه بقى يا عم اللوا عبفتاح “نظرًا لتاريخ هذه الجماعة في ارتكاب الجرائم وافتعال الأمور المقلقة للدولة والأمن (شوف ازاي؟؟؟؟!!؟)ه
(وكشف عمر عن أن هناك معلومات مؤكدة تدين الإخوان في هذه الجرائم وموجودة لدي الأجهزة الأمنية وأنه من الممكن الإعلان عن أسماء المتهمين فيها خلال الأيام المقبلة (ومابيعلنوش ليه يا باشا مكسوفين ولا من باب الادب والاخلاق يعني الحكومة بتوجب مع الاخوان وبتستر عليهم)ه

اتخنقتوا

.
.
.
طيب فقدوا اعصابكم
.
.
.

استنوا الغباوة جاية ورا
عم اللوا الكبير قال (الإخوان أصحاب المصلحة الأولي في ارتكاب هذه الجرائم بعد أن كشروا عن أنيابهم مؤخرا مضيفا أن هذه الأفعال، هدفها شغل أجهزة الأمن وإحداث بلبلة في الدولة)
وحياة والدك ..؟؟؟؟؟؟ه
يعني مش مكسوف على دمك وانت بتقول الكلام ده ؟؟؟؟!!!ه

هو مين اللي عايز يلهي الناس بالظبط ؟؟؟ًً

ده سؤال مش بريء

وبعدين الراجل بيقولك ايه الموضوع بتاع السفاح مالوش علاقة بالتقصير الامني لان اصلا الامن الجنائي هو المسؤول عن قضية السفاح انما ايه بقى اللوا الكبير كشف لنا ان قضية السفاح دي مش جنائية ولا حاجة دي سياسية خالص
آه والنعمة
وان السفاح “سفاح المعادي ليس مجرمًا جنائيا، وربما يكون مجرماً سياسياً داخل الجماعة يرتكب جرائمه بقصد إرباك الأمن)ه
——————————————————————————————————————————————————————————————–
مسألة أخرى تكاد نا تفجر شرايين الدم في عقلي
ما هذا الهوس المفاجئ والانقلاب العجيب على الشيعة في العالم العربي
وبعد ان كان الجميع يتحدثون عن مؤامرة صهيو-أمريكية اصبح الكلام الان عن المؤامرة الشيعية بتدبير إيراني
هو فيه ايه بالظبط ؟؟؟؟؟ه
المصيبة ان الحملة المفبركة دي ريحتها باينة قوي
مقدرتش اعدي الكلمتين دول لما قريتهم في الجرنال
مصر تعرب عن قلقها العميق إزاء تنامي اتجاهات تهجير السنة من بغداد
(من امتى كنا بنفتح بقنا عن اي شيء يخص العراق إلا عشان نقول نشجب ونندد وندعو الاطراف العراقية للمش عارف ايه
والعنوان ده
السعودية قد تتدخل في العراق في حالة وقف المساعدات الامريكية لوقف الشيعة عن قتل السنة في العراق
وده بقى حرق دمي بجد
الاهرام في عددها الصادر يوم الاحد مصادر (دبلوماسية للاهرام :المخابرات الايرانية قتلت إيهاب الشريف للحيلولة دون قيام مصر بدور في العراق ..ه
(إيران وراء قتل الشريف) .. رد فعلي .. نياهاهاهاهيا هاهاهاها هي هي يه هوهياها
جاتكوا نصيبة يا بعدا لسه فاكرين
واحنا بسلامتنا من امتى كان لينا دور فعال وقوي وواضح في العراق
ده ايه القرع المباشر ده ؟؟؟؟
القرضاوي يدعو لعدم نشر المذهب الشيعي في بلاد مستقر بها المذهب السني
حسن نصر الله .. بطل الامة .. الله ينصرك بنصر الله .. ده أمس
اليوم .. حسن نصر الله الشيعي بتاع لبنان .. الله يحرق الشيعة كلهم اللي عايزين ينشروا مذهبهم على حساب السنة
فيه كام فار بيلعب في عبي وستين نحلة بيزنوا في دماغي
.
.
الحملة دي كلها مش بريئة ابدا
————————————————————————————————————————————————————————————————
تواصل الاقتتال الفلسطيني الفلسطيني .. يظهر الرصاص الاسرائيلي غلي .. او يمكن التسعيرة عليت ننتظر خطابات شكر من تل ابيب على رام الله وغزة
ماعنديش ليكوا غير كلمة واحدة … الله يقرفكم .. جتكم خيبة كلكم … اتفووووووووووو
لا اتمنى سوى ان تستمروا في الاقتتال … وتخلصوا على بعض حتى تتطهر الاراضي المقدسة منكم
——————————————————————-
خدوا عندكوا مصيبة منيلة تانية
انخفاض مخزون الدم الاستراتيجي في مصر بنسبة 70% ايه ده هو كان كله ملوث ولا ايه .. الله يحرقكم يا بعدا .. هي سندوتشات كبده معفنة دي كمان ولا ايه
واعتقد انه بعد فضيحة الدم الملوث كله سحب الدم التعبان والملوث وغير القابل للاستخدام الادمي فلم يتبقى طبعا سوى نسبة بسيطة فقل المخزون 70% ه
———————————————————————
ودي فضيحة تضحك بجد ..ه
رسالة الموقع الرسمي لمعرض القاهرة الدولي للكتاب

This website is offline for delayed paymentplease make your payment in full to get it online againهذا الموقع موقوف للتأخير في سداد المستحقات الماليةبرجاء سداد كامل المستحقات ليعود إلي العمل
http://www.cibf.org/

ادفعوا اللي عليكوا بقى …فضحتونا الله يفضحكم
لا بيقولولك المعرض الدولي …دولي ايه بقى
— لا تعليق …ربنا يولع فيكوا بجاز يا بعدا
————————————————————————————————————————————————————————————————

سؤال ومشوها برئ المرة دي

شيمون بيريز بيعمل ايه في قطر ؟؟
Comments
  1. karakib says:

    >فاكره فيلم أحمد زكي بتاع الهروب ؟؟اللي لما كان بيسطح عالقطر بيتفرج علي الصقر طاير فوقه و يحس بنفس الحريه ؟ فاكره الظابط الشريف أبن بلده الفنان الرائع المحترم عبد العزيز مخيون ؟؟ طيب فاكره ليه كانوا بيكتبوا فالجرايد عن منتصر بطل الفيلم و أيه الأوقات اللي كانوا بيكتبوا فيها … دي برضه كلها اسئله غير بريئه بسبب موضوع السفاح الجهنمي الهلامي اللي معمول من الجيلي اللي لو مسكوه من ناحيه يهرب من الناحيه التانيه علي طول ———————–أما عن المؤامرات الصهيو مهلبيه و المؤامرات الملوخيه بالتقليه .. ففاكره بطل فيلم في فور فينديتا لما قال لأيفي بطلة الفيلم أنه لازم يحسسونا أنه دايما في خطر … ده بقي برضه مش سؤال بريء————————أما عن أنخفاض مخزون الدم … فده بقي شيء جديد .. الدم ما كانش كله معفن لأ كان في دم كويس بس قرب يخلص خلاص ..ما بقاش في دم … و لو فيه يبقي محتاجين نجيب كيسين من أبو شلن يمكن يكونوا أحسن من اللي بيشلوهم فيه .. اما عن سندوتشات الكبده المعفنه . فلو سمحتي .. عندك بقي !! مالها الكبده المعفنه ما كلنا بناكلها و زي الفل اهه و تمام .. هنا لنا وقفه بقي لو سمحتي ما تغلطيش في سندوتشات الكبده المعفنه علشان في ناس كتير أوي بتحبها —————————-أما عن معرض الكتاب .. و موقعه علي الأنترنت فديه شوية شكليات و المفروض نلم من بعضينا كل واحد نص جنيه ورق قديم و نروح نتبرع بيهم لصالح تسديد ديون … موقع معرض الكتاب اللي لما الناس بتحاول تشوفه تصاب بالأكتئاب ————————السؤال الأخير بتاع شيمون بيريز فهو أكيد له واحد صاحبه هناك رايح يزوره و يوده بس خلاص

  2. Reformer1976 says:

    >صدقيني يا بلو ومين سمعك… نفس حالة التهييس الاكتئابي دي بتجيلي بصفة شبه يومية عقب متابعتي للأخبار وخصوصا المحلية منها… دا ف موضوع إيران مثلا بعد التصريحات اللي نزل في الأهرام دي المتحدث باسم الوزارة طلع نفى نفي قاطع أن تكون الخارجية اتهمت إيران أو أي حاجة من دي… بعدها بساعات نفس المتحدث وزع بيان تاني على الناس كلها بينفي فيه البيان الأول وبيقول لهم إنه كأن لم يكن على طريقة نفي النفي مش دايما بيكون إثبات وابقي قابليني لو فهمتي في الآخر الخارجية عايزة تقول إيهكله بيلعب على كله لما تشوفو قول له… وصلنا إلى أسفل مراحل الانحطاط في كل شيءوعندك واحد سفاح خمسيييينة وصلحوووووووا

  3. Abdou Basha says:

    >:)والله مش ضحك كالبكاء ده ضحك كالضحك، الواحد جتته نحست خلاص.. بس انتي كده هتشجعي الواحد انه يسجل حبت خرافات من الجرايد برضه

  4. >قهوة عالية قوي ..وكئيبة برضة ..بس عندك حق ..وبالنسبة للشيعة ل أحد ينكر أن هناك حملى سياسية (ومدينة أيضا)للقضاء عليهم بس في نفس الوقت محدش ينكر إن زي ما في شيعة كويسين -وهما قليلين جدا-في شيعة -وعذرا على اللفظ-أوساخ..منافقون ..وفي جميع الحالات الحق حيظهر في النهاية 0

  5. yasser_auf says:

    >عزيزتي بصراحة موش عارف اقولك او اعلق اقول اية … يعني انا عن نفسي بطلت اشتري الجرائد موش قرائتها بس … من اكتر من سنة موش للتوفير و الله و لاكن لقيت ان ميكي جيب و تان تان افيد علي الاقل بتسلي عموما و اية الجديد في الي بتقولية نقلا عن لسان المندوب السامي للامن القومي هو بيسمع اللي محفظنهولة و المفروض ان العبط يصدقوا و يقولوا امين صح الجامعات غلط هما السبب ” موش معني كدة اني مؤيد ليهم بالعكس ” و لاكن هو دة نظامنا العربي الشماعة ارمي هبلك و غلطك علي حد تاني غيرك .. الفت نظر الناس لحاجة … يتلهوا بيها علشان الكارثة و الطامة الكبري … سواء بقي علي الصعيد المحلي الداخلي او الخارجي …و لو نظرتي لكل ما هو مكتوب بالجرائد بخلاف الاعلانات و سوق السيارات و العقارات و الموبيلات حضرتك حتلاقية متايف و نازل من فوق للنشر جاهز و الي كاتبة معروف ولائة لمين عادي اية الجديد …الي لفت نظري فما كتبتية قوي هو السعودية حتخش العراق علشان السنة الي بيتقتلوا ….هاهاها دي بقي الي حلوة طيب ما دخلتهاش لية ايام الكويت .. هي عندها اصلا بوليس درك لما يكون عندها جيش … و لا برضة حتجيب الامريكان برضة بفاتورة حساب للدخول بدلها للدفاع عن السنة … و لا امريكا طلبت منها ذلك علشان يبقي فية حمار جديد يدفع فاتورة الامريكان بالعراق لتخفيف الضغط عن بوش … معرفش بس الي مستغربلة بجد انها عاوزة تخش العراق دي لفظ بجد استفزني … طب هما بس يخلصوا من بلوتهم في الجنوب …. اما الاخ الي بيزور قطر …و فيها اية اية الي مزعلك ما هما شبة مقيمين في شرم الشيخ زيارات اسبوعية لدرجة اني ساعات بحس انهم ناوين يقلبوا مقر الحكومة بتاعتهم عندنا بشرم الشيخ يعني بحكم انهم بيقولوا اننا ولاد عم يعني و لاد عم مين مع مين ماتساليش لان دي لوحدها قضية امن دولة السب في الذات المباركية اما موضوع انخفاض مخزون الدم … فاظن ان دة سببة ان احنا ذات نفسينا ما بقايناش شعب عنده دم من اساسة .. لاننا راضين بالي بيحصل فينا … فمن اين الدم علشان نتبرع بية ..غالبا حيستوردوة من برة بعد كدة دة تمهيدي لفتح مناقصة ان شاء الله حترسي علي وزير سابق او عضو مجلس شعب حالي او اخو وزير لاستيرادة و اظن انة حيكون اوفر و ارخص حيبعتوة بامراضة جاهزة و بعدة باسبوع حيبتدوا يبعولنا دواء الامراض الي جوة الدم و الكيس دة طبعا بعد ما المسؤل يكون لم قرشنات فلوس الدم و نرسي بقي علي الي علية الدور مناقصة استيراد الادوية

  6. tota says:

    >بلو ستونمنذ فترة وانا لا اقرأ الجرائد سئمت تكرار نفس الاحداث وكأنه مسلسل ممطوط ممل مثل الجرئ والجميلة تغيب 100 حلقة لتعود لنفس الاحداث السفاح والفشل الزريع للقبض عليه اعطى فرصة للهراءات التى لا تستساغ بأى حال من الاحوال مخزون الدم ؟ هو كان فى مخزون علشان ينخفض بالله عليكى ده الهيروين اسهلوالحصول على كيس دم يصلح للاستخدام الادمى نادر حتى من قبل اكياس الدم الملوثة ثم اى متبرع عنده فى الدم البدع يعنى التلوث موجود من غير اكياس هنظلم الكيس ليه الشيعة والسنة المسلسل متواصل هو احنا فى الحلقة رقم كام دلوقتى اصل معرض الكتاب عاملوا التذكرة بجنيه وكانت قبل كده باين بخمسة جنيه بيدفعوا منها الديون اللى عليهم طول السنة فيظهر الجنية مش مكفى والله اعلم احنا واضح كده استهلكنا مخزون الجاز الاستراتيجى والكبريت علشان نولع فى كل ده تحياتى

  7. >بالنسبة للإتهامات ضد الشيعة بظن هي هجرد خطة امريكية صهيونية للقضاء على المسلمين فكلما بقي شملهم متفرق كلما كان افضل لهم لتحقيق مخططاتهم في العراق و ايضا في فلسطين التي نجحوا فعلا في شعل نار الفتنة فيها بين فتح و حماس لتسهل عليهم المؤمورية الله يجمع شملكم ياعرب و يا مسلمينقهوتك عزيزتي على الجرح

  8. lastknight says:

    >يووووووه عليكى ياغاليه لما تقعدى تسألى كده اسئله واضحه خالص .. ياساتر .. عموما ياستى أيوه طبعا الأخوان هما اللى عملوا سفاح المعادى .. أمال مين يعنى .. ؟ تفتكرى مثلا هايكون العصابه اللى عملت مذبحة بنى مزار و اللى الأمن اسمالله عليهم مسكوا فيها المجرم العتيد .. لكن القاضى بخيبته طلعه براءه ؟ لأ طبعا .. هم الأخوان .. الأمن بتاعنا اسم النبى حارسهم مابيفشلوش أبدا و المؤامره طبعا من أيران .. ماشفتيش صور الجحش العجوز بتاعنا و هو لابد تحت حضن أولمرت لا مؤاخذه زى القطه الغناجه .. يعنى أحنا سمن على عسل مع اسرائيل .. و الريس بتاعنا بيسيب أولمرت يحضنه كل ماييجى مصر .. لكن بقى أيران .. لأ طبعا .. أيران دول وحشين .. عمرك شفتى حسنى بيحضن أيرانيين ولا بيبوسهم ولا حتى بيعملهم باى باى ..؟ ماحصلش .. يبقى أيران هم اللى بيعملوا كل المؤامرات و الحاجات الوحشه .. و اسرائيل ياعينى عليهم ملايكهاشيعه بقى القرضاوى قال أنهم غلط . و السعوديين قالوا انهم كفره .. و بما أنى أهلاوى .. يبقى الناس دى صح .. و الشيعه غالبا زملكاويه .. يبقى نموتهم احسنمسألة الفلسطينيين مع بعض .. مأساااااه .. مش عارف اكمل هزار لما بافتكرها .. لكن عن شهود عيان .. و خلال جلسه بين بيجن و السادات .. أقر بيجين أنهم لو يكرهوا الفلسطينيين و يتمنوا أبادتهم .. لتركو لهم فلسطين عام واحد .. خلاله سيتكفل الفلسطينيون بأبادة بعضهم البعض .. ساعتها أنبرى السادات مدافعا عن الفلسطينيين .. لكن بأحساس أن بيجين كان على حق ياااااه يا غاليه .. ده أنتى مزعجه يا شيخه .. منك لله

  9. lastknight says:

    >معلش ياغاليه .. نسيت افكرك أنى اتكلمت قبل كده فى موضوع الممارسا البيطريه فى السياسه المصريه .. بألهاء الشعب عن ألمه بألم أكبر فى منطقه أخرى .. و أعتقد كراكيب اتفق معى وقتها و كمان بانتظار تعليقك عل موضوعى صراع سقراط و بطيخهبالنسبه لمذكرات امرأه مثليه .. سيدتى .. الفتنه لم يزرعها عندنا أح .. نحن خلقنا مفتونين .. المؤامره حتى لو افترضنا وجودها فقدرتها محدوده تماما .. لولا أننا أغبياء .. لما قتلنا أنفسنا .. و على رأى المثل البلدى .. طول ما النغفل عايش .. النصاب يرزق بمعنى لو لم نكن مغفلين .. فما كان للنصابين أن ينجحوا فى أرضنا

  10. farida says:

    >القهوه بترفع الضغط .. دي حقيقهو الجرايد المصريه ترفع الضغط و قد تسبب سكته دماغيه من كتر التفكيردي حقيقه طبيه مؤكدهانا بطلت قراءة جرائدو الله في ناس بتقول لي ده جهل انك مبتقريش الاخبار و لا بتسمعيهاو انا بقولهم الجهل نعمهانا بقرا الاخبار ع النت و بشوف آراء المدونينو الضغط بيعلى و بكتب ساعات راييو ساعات بسكتو بحس مرارتي حتتفقعبس البوست بتاعك هايل فيه كل الخلاصهبسببك حمتنع اسمع اخبار لمدة شهر كامل اللي انتي كاتباه كفايهو بالنسبه لأسألتك البريئه و غير البريئهفالاجابات بعد الفاصل التاريخي اللي حيتكتب في تاريخ البلد دي و اللي الله اعلم حيكون فيه ايه

  11. logarithms says:

    >للاسف ضحك يدمي القلبهل وصل بنا الحال لتلك الدرجةيستخفون بعقول الجهلاء ويبررون تقصيرهم بتلك الاساليب القذرة في الكذب وقلب الحقائقبجد من اغرب ما سمعت عن الاخوان في الفترة الاخيرةاما بقي اكياس الدم فهقولك كلمة واحدة (يبقي انت أكيد في مصر )وبالنسبة للشيعة فعندك حق … من امتي مصر ليها دور !!

  12. bluestone says:

    >يا كراكيب يا خويا هو السفاح الجيلي كولاده قلبي بيقوللي ان فيه وراه مصيبة سخنة وعايزين يغطوها لانها غالبا محرجة جدا بالنسبة لهم ——————– انا شخصيا بموت في الملوخية .. بس الكوسة طبعا اجمل واجمل يا سلااااااام عليها بشوية قوانين وتعديلات دستورية وبشاميل … ————————هو فكرة اننا نلم لمعرض الكتاب برضه فكره كويسةكل واحد بريزة من مصروفه برضه والناس لبعضيها والبلد مزنوقة في قرشين بدل ما بتوع السرفر يفضحونا ويجرسوهم الجرسة دي ——————–

  13. bluestone says:

    >ريفورمرهما غالبا بيعتمدوا على ان مفيش لا حد بيقرا ولا حد بيسأل ولا حد بياخد باله من اساسه ولا بيهتم النهاردة مثلا الخارجية المصرية نفت ان تكون مصر تمد محمود عباس بالسلاحرغم ان الموضوع ده بقاله اكتر من 3 اسابيع معلن ومفيش اي رد فعل من المصريين .. فجأة طلعوا نفوا بدون اي مبرر وبعد كل الوقت ده

  14. bluestone says:

    >عبده باشا ما هو لو فعلا الواحد بطل يحس كان اهون بس المشكلة ان مفيش مناعة ابدا من النوع ده من مسببات أمراض ضغط الدم والسكر وخلافه

  15. bluestone says:

    >دكتور احمد كئيبة كئيبة هنعمل ايه ما هي اي قهوة حتى لو سياحي بتعكس نبض اللي قاعدين عليها والشارع اللي هي فيه ,, والوضع مش محتاج كلام انا اتفق معك تماما ان اكيد فيه شيعة كويسين وشيعة ليسوا كذلك كمان فيه سنة كويسين وسنة ليسوا كذلك تماما زي ما فيه مسيحيين كويسين ومسيحيين ليسوا كذلكاقصد ان المسألة كلها لا علاقة لها بالمذهب .. دول بني آدمين .. فيه منهم الكويس وفيه الوحش اما ما اختلف معك فيه هو حكمك على الشيعة بان الكويس اللي فييهم قليل اعذرني الحكم غير منطقي .. وغير مضبوط علميا .. بمعنى اني لكي اصدر حكم كهذا فهذا يعني اني اعرف كل الشيعة الموجودين في العالم وان من واقع معرفتي بهم اصدر حكما كهذا اما الاحكام العامة فهي غير علمية خاصة فمقدرش اقول .. اغلب المسلمين مثلا متطرفي الفكر والمعتدل منهم قليل ..لان ده ببساطة غير صحيح .. لانه حكم يتطلب معرفة جميع أطراف المسألة وافرادها لاصدار الحكم

  16. bluestone says:

    >ياسرعوف: كان نفسي ابطل اقرا اخبار .. بس هنعمل ايه .. ماهو اصل طباخ السم وقراية الجرايد بقت من مساوئ المهنة بعيد عنك معندكش شغلة ليا في ميكي جيب اكثر ما ادهشني في كلام رئيس لجنة الامن القومي انه راجل تقيل ومش سهل ومكنتش متخيلة انه يقول كلام سطحي بالطريقة دي طبعا انا متأكدة ان 99% من الاعلام المصري اعلام موجه صرف وهما الصراحة مش بيحاولوا يخبوا ولا يخفوا المسألة دي كله بتوجيهات سيادته اما بالنسبة للسعودية فاشكال التدخل مختلفة ففيه تدخل غير مباشر وهو الاوقع والاقرب واللي ممكن يكون فعلا حاصل دلوقتي وهو مد الجماعات بالسلاح مثلا التأثير على الحكومة بالمساعدات .. وغيره الواضح ان السعودية وإيران بيلعبوا مع بعض في ملعب خارجي تماما وهو العراق ودي احقر حاجة ممكن يعملوها كل واحد بيحاول يعزز نفوذه في المنطقة على حساب دم العراقيين ——–وبعدين ان هتتكلم على شرم الشيخ .. ليه بقىىىىىىىى .. ده حتى احنا بنشجع السياحة وشعب مضياف .. ده كرم الضيافة يا باشمهندس —المشكلة في موضوع مخزون الدم ده ان لما اتفضح الموضوع كله طبعا لم الدم غير الصالح والمضروب .. راح المخزون قل 70 في المية معنى كده ان 70 % من مخزون الدم كان اصلا فاسد ومسكوت عنه على العموم .. حلوة مناقصات الادوية دي .. ما تيجي نعمل مشروع احنا كمان على مناقصة ادوية ..

  17. smraa alnil says:

    >مش عارفة عايزة اقولك اني مش عايزة اعلقبس حبيت اقف جنبك كدة واقول نفس اللي انتي قلتيه جتكوت القرفبجد بطني وجعتنيكان نفسي اقول كلمتين علي كل موضوع بس نفسي مش جايبانيحسبي الله نعم الوكيل

  18. >بلو ستوناول مرة اتشرف بالتعليق فى مدونتك واول زيارةـ واضح انك من المدونين ان لم يكن من الكتاب المتمكنين من القلم ـ وسوف اتشرف بقراءة كتاباتك من الان فصاعد ـ اشكر مرورك على مدونتى وكتابة تعليق ويسعدنى مرورك الذى اتاح لى التعرف على مدونتك ـ تحياتى

  19. >عندك حق ..قد أكون تعميمي إلى حد كبير وانا عموما ماكنتش بتكلم عن الشيعة على مستوى عالمي ..بل على مستوى شرق أوسطي إن صح التعبير بالنسبة لقيادات الشيعة فانا يمكن مابحترمش غير نصر الله وعدد قليل جدا من بعض الآخرين لكن الباقي ..نجاد ورفسنجاني وقادة الشيعة في العراق ..حسبي الله ونعم الوكيل ..أما بالنسبة للناس الشيعة نفسهم فحد قال عليهم حاجة ؟دول ناس طيبين جدا و بسطاء قتلوا كما قتل السنة في العراق الموضوع مش موضوع مذاهب فعلا ..موضوع صراه على السلطة خد أكتر من طابع من مختلف الجهات في الشرق الأوسط..ديني..ليبرالي ..وغيرها من الشعارات المطاطة التي يخفون بها نواياهم ..عذرا إن كنت طولت في الكلام وموضحتش وجهة نظري كويس المرة اللي فاتت0مع تحياتي00والسلام عليكم0

  20. >يا جماعه لازم نعرف الاول اية هوة المذهب الشيعي واية هيه مبادئةقبل مانقول انة مخطط امريكي لتنفيرنا من الشيعهوهذا كلام غير صحيح بالمرةفالشيعه مسنودون من امريكاوالشيعه في الاساس هم من اسقط تماثيل صدام و نهب البلد فور سقوط النظامالشيعه هم من يقومون بعمليات وكمائن يومية لاغتيال السنةيكفي ان تعرف انهم يستوقفون المارة و ينظرون في تحقيق الشخصية و من يسمى عمر او بكر او عثمان بيقتل ويحرق او بيعذبوه وبيحرقوه وهو حيويحرقون المساجد و منازل السنةالشيعه يعتبروننا كفرة و قتلنا حلال لهم و يسموننا التكفيريين او ابناء العامة بينما يسمون انفسهم آل البيتوالنواصب هم السنه لانهم نصبوا العداء للامام الحسين وأل البيتويسمون نساؤهم الزينبيات يعني حفيدات زينب الحوراءوبالنسبة لهم المذهب الجعفري هم المسلمينيعني الحنفي والشافعي والحنبلي وكل الباقي كفار وواجب قتلهمالشيعه لا يعترفون بالرسول ولا بالسنةولديهم ما يسمونة عترة أل البيت يعني شي هم اخترعوه كتاب مثل سنة الرسولو بينكروا انه كان عند الرسول (ص)اولاد وبنات …الرسول فقط كان عنده فاطمة الزهراء اما بناتوا واولادوا الباقين فكانوا ربائب يعني الرسول متبنيهمبيقولوا انه جبريل غلط لما نزل القران لان الله كان أمرة انه ينزلوا على علي وهو غلط بين الاثنين ونزلوا على محمدولذلك في الصلاة بيضربوا رجلهم 3 مرات وبيقولوا ..خان الامين خان الامين خان الامين, يقصدون جبريل علية السلام انة خان رب العالمينويقولون انة عندما خلق الله ادم ودخلوا الجنه…ادم شاف خمس اشباح فعاتب رب العالمين…قلوا يا ربي انت مش قلت انه انا اول انسان؟؟قال لة شايف الخمسة دول؟؟ادم جاوب ايوة يا ربيدول محمد وفاطمة وعلي والحسن والحسينانا خلقتك وخلقت الكون كله وخلق العرش والسماء والارض وكل حاجة علشانهمو يقولون ان فاطمة وعلي والحسن والحسين مخلوقين من غير تربة ومن غير كوكب من كوكب اسمه كوكب الخلقولا تعليقوالعاشر من محرم عند الشيعه عطلة لانة مقتل الحسين و بيقوموا فية بطقوس معينة بيلطموا ويجرحوا اجسامهم بزناجيل حديد من اللطمزواج المتعة عندهم حلال, بل وحلال ان المرأة تهب نفسها لمتعه جيش المهديمقتدى الصدر احد زعمائهم وايه من ايات الله والاية عندهم اهم من النبي والقران يعني كلامه اهم من كلام رب العالمينايران هي اللي بتحركهم السيستاني وهو مرجعهم الديني ايراني الجنسية واصلا لا يتكلم العربيةالسنة في العراق 55% والشيعه 45% وكانوا يتعايشون في سلام ظاهر و لكن الحقد دفين وكانوا ينتظرون اليوم الذي يسقط فية صدام و هم من خانوة كي يتبوأوا نظام الحكم تحت راية الامريكانو لكي يذبحوا في السنيين ويقتلوا كل السنهعذرا للأطالة لكن وجب توضيح الفكر الشيعي لكي نعرف من همتحياتي

  21. film69 says:

    >كل ده يا بلو ؟ معقولة ؟الغريبة أن إحنا لسه عايشين وبنتنفس وحنفطس من الضحك ، قصدي من الغيظ ولم نتوقف عن قراءة الجرائد ومتابعة الأخبار رغم ذلك من الأشياء المضحكة المحزنة خبر قرار حكمدار العاصمة بالإغلاق المبكر لمحال وسط البلد وإلغاء حفلات منتصف الليل في دور العرض للقضاء على ظاهرة التحرش والبلطجة تم الرجوع في موضوع إلغاء حفلات منتصف الليل بعد ضغوط ومفاوضات ولكنه يكشف العقلية التي يفكر بها الأمن ” ما نقفلها ونستريح “تحياتي

  22. >معلش جيت متأخر كتير .. الموضوع أكتر من رائع وفعلا يرفع ضغط الدم ويفقع المرارة وحاجات تانية كتيرةشكرا ليكي وشكرا كمان للزملاء اللي أفادونا بتعليقاتهم اللي فيها معلومات مفيدة .. وماسابولناش فتفوته نقولها بعد اللي إتقالتحياتي

  23. >انا أحسدكانا أحسدكأناأحسدك

  24. >على فكرة انا كتبت أول قصة قصيرة النهاردة ارجو التشرف بالزيارة ومعرفة رأيكم فيها عشان ده هاممني جدا0مع تحياتي00والسلام عليكم0

  25. bluestone says:

    >سمراء النيل:المشكلة ان القرف ووجع البطن في بلدنا بقى احساس يومي —-جدو:اولا منور يا جدو من تلك القارة الاخرى على قهوتنا المتواضعة .. ——د/احمد المصري:هو انا شخصيا لا احترم نصر الله هو كمان ليا رأي بسيط .. وهو ان السياسة والبيزنس مالهمش دين ولا اخلاق دينهم المصالح وربهم الاعلى الدولار واليورو ورفاقهم من العملات الصعبة خالص————-توتا:بقالي مدة يمكن اكتر من سنة ممتنعة تماما عن قراءة الصحف القومية وده لان صحتي ماعادتش زي الاولولا اتابع التلفزيون المصري إلا لاغراض العمل ..برضه عشان الامراض انما البواخة بقى ان كل الاخبار بقت تسد النفسيعني تخيلي تروحي الشغل الصبح وتسألي الناس سؤال بريء جدا (ايه الاخبار؟)هتلاقي تشكيلة قتلى على انفجارات على صراعات على شوية فساد وتندمي انك سألتي اصلاموضوع الدم ده فكرني بالقضية بتاعة الدم الملوث بالايدز يا اللي بقالها اكتر من 10 سنين ..وفي الاخر دبسوا فيها الممرضات البغاريات ودكتور فلسطيني رغم ان الايدز اصلا كان منتشر قبل وصولهم بيني وبينك فعلا مخزون الجاز الاستراتيجي مهم جدا يعني كل واحد لازم يخزن شوية على قده عشان وقت زنقة يولع في روحه وخلاص.

  26. >انا بكيت بسمالاقيتش حاجة اضحك عليهافعلا..هو بكاء كالبكاء:)(اللي اختشوا….ماتواواللي ماختشوشتلاقيهم في كلية الشرطة …

  27. bluestone says:

    >الحصان الاسود:بعيدا عن دراسة العقائد والخوض فيها لانه لا يوجد مذهب قائم لمجرد تدمير مذهب آخر …ولا اؤمن ابدا بتعرض السنة لمؤامرة كونية مهلبية ملوخية من العالم كله والعوالم المجاورة والمجرات والكواكب !!!!!!قليل من المنطق يرحمنا الله زي ما قلت في تعليق قبل كده السياسة والبيزنس مالهمش دين ولا ملة ولا عقيدة ولا اخلاق كمان اي حد بيشتغل سياسة او بيزنس عارف كده كويس —من اسقط تماثيل صدام في العراق مكانش الشيعة لوحدهم كان الشيعة والاكراد والسنة كمان .. الراجل كان قامع البلد. ما يحدث في العراق الان حرب طائفية عشان العراقيين ولا مؤاخذة زي كل العرب خرفااااااان مش فاهمة اي حاجة وكل واحد فاكر نفسه احتكر الحق وان ربنا بتاعه لوحده وان كل الناس بيتآمروا عليه لانه هو الوحيد اللي على حق—طيب وتقول ايه في الاغتيالات والانفجارات اليومية في مدينة الصدر ولا كربلاء ولا النجف ..الشيعة بيفجروا نفسهم تمويه يعني ….؟؟؟وعلى كل حال انا مش شايفة لكل الشرح بشأن المذهب الشيعي اي فايدة.. لست شيعية ولا استطيع الحكم على صحة المعلومات دي .. ولكن في النهاية لا تعنيني في شيء…. كل حر فيما يعتقد يا سيدي .. وهذا لا يعني اهدار دم احد. ——————————— film69… احنا تقريبا جتتنا نحست :)) هو مبدأ ” ما نقفلها ونستريح “طبعا مبدأ وطني جدا وتاريخي وفرعوني كمان ولو عايز تعترض… روح القسم ..لو تقدر🙂 عملا بالحكمة الفرعونية العتيقة (الباب اللي يجيلك منه الريح سده وابنيه بالطوب الاحمر وادهنه جبس واسنمت ومعجن عليه ولا كأنه ماكان… واستريح واللي مش عاجبه يستجري يهوب من القسم وطبعا ماحدش هيعمل كده عملا بحكمة حكمدار العاصمة اللي خايف مايتكلمش يا جماعة واللي عايز يحترم نفسه ما يروحش اقسام بوليس ———–يا مراكبي:ولا متأخر ولا حاجة الحكمة الامريكية الشهيرة بتقول better late than neverويا سيدي تنورنا في اي وقت———————-الزرافة الحسودة:استهدي بالله يا ست طويلة كده العين صابتني ورب العرش نجاني والنيولوك ده مش تنطيط دافعينه بالتقسيط ——————————–

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s