خللوه ….

Posted: 21/03/2007 in Uncategorized

لا أدري لماذا كل هذا الغضب والجدل بشأن التعديلات الدستورية
مهزلة الدستور هذه ذكرتني بمسرحية عادل امام شاهد ماشافش حاجة حينما دفع فاتورة التليفون (احسن يشيلوا العدة) مع انه معندوش تليفون

هذا يا سادة ما نفعله بالظبط
خايفين لا يشيلوا العدة
مع اننا معندناش دستور
قصدي تليفون

هل يملك أحد الجرأة ان يقول لي ان الدستور مطبق في مصر ؟؟؟؟؟ وان المسؤولين يحترمون هذا الدستور ؟؟؟؟
ألا نقرأ كل يوم عن تصرف أو فعل أو تصريح ما “يخالف الدستور” مخالفة واضحة لا يخطئها عاقل

طيب فين المشكلة إذن؟؟؟؟؟؟


عجبا (دي اللي قبل سحقا على طول) لهذا النظام الحاكم … فلماذا يصدعون رؤوسهم بتلك التفاهات .. ويعلنوا تغييرا لبعض الاوراق الصفراء وتعديلات
ثم تأليف وإخراج ملهاة في البرطمان (مجلس اللعب في القوانين) لكي تتم مناقشة التعديلات
ثم الاعلان عن استفتااااااء (ومشيها استفتاء حرصا على السادة بتوع البذاءات)ه
قال يعني …موافقة الشعب هتقدم او هتأخر
أليس هذا محض عبث مطلق ….ألا تخالف الحكومة والمسؤولين هذه الاوراق الصفراء يوميا آلاف المرات
الا تعد تصرفات السادة رجال الشرطة في اقسام الشرطة والسادة رجال الامن في كل الاجهزة من امن الدولة إلى الامن القومي إلى الامن الغذائي انتهاكا يوميا للدستور

أليست بعض القوانين التي تتم الموافقة عليها في البرطمان تمثل انتهاكا للدستور
بدءا من قانون الطوارئ طويل العمر
والنيولوك بتاعه (قانون مكافحة الارهاب
ألا ينطوي باعتراف رجال القانون على مخالفة واضحة لهذا الكيان الغامض المسمى دستور؟؟؟
ثم ما هو الدستور أصلا؟؟؟؟؟؟
هاتلي أي مصري عارف ايه هو الدستور ؟؟؟
المصريين لا يعرفون سوى دستور ابراهيم عيسى
ده لو كانوا بيقروا وعندهم وعي وبتاع

فلماذا هذه الجنازة الحارة
والميت اصلا مش موجود

ثم من امتى تتوقف الحكومة عن اي عمل لانه يخالف الدستور
منذ متى يتوقف النظام الحاكم عن هذه التفاهات؟؟؟
مسيرة الديموقراطية يجب ان تسير حتى ولو على حثة البتاع ده
لهذه الاسباب اغتاظ جدا لاحتجاجات المعارضة والحركة القرعة والمظاهرات
ما جدواها ؟؟؟ ولماذا البكاء اصلا على اللبن المشروب
وأخيرا سؤال لكل المصريين
ولاصحاب الاجابة الصحيحة هدية قيمة
عبارة عن تذكرة سفر للخروج من مستنقع الديموقراطية
وعلى طريقة مدرسة المشاغبين

:اجب على السؤال التالي واختر من متعدد (ودي من عندنا
-ما هو الدستور؟

هل هو التحية التي كانت تلقيها الست جدتك وهي داخلة على جيرانها وتقول (دستور يا اهل الدار )ه
-هل هو ما كانت تفعله الست عدلات جارتكم حينما كانت تتخض فجأة فتتف في عبها تقول بعد شهقة طويلة (دستووووووووووور
-هل هو الصحيفة التي يجلس على تلها ابراهيم عيسى ويديرها من سجنه ويصدع دماغنا بمقالات طويييلة اصبحت مؤخرا مملة ويعمل بها نصف اسرته واصحابه ويتكلم فيها عن العدل والحرية وهو مطلع دين الصحفيين الصغيرين؟
-هو شيء هلامي خرافي يرادف مفهوم الغول والعنقاء في الثقافة العربية القديمة وابو رجل مسلوخة في الثقافة المعاصرة يسخنون به النشطاء الصغار والعيال بتوع المعارضة ؟
-هل هو لعبة مشهورة يلعبها اعضاء البرطمان لما بيزهقوا من النوم والخناق بالجزم وقزقزة اللب اهم قواعدها انه لا قواعد على الاطلاق؟
-هو كتاب قدييييم اثري لا احد يعلم مكانه على وجه التحديد
-مصطلح لغوي مهجور مشتقة منه كلمة (دستورية) التي تستخدم للفشخرة في البرطمان؟
.
.
ومن يجد الفقيد له الاجر والثواب
وما نجيلكوش في حاجة وحشة
Comments
  1. المٌهَــــاجِر المَصْـــــــرى says:

    عزيزتى
    الظاهر ان احنا مولدين فوق رووس بعض..يا إما عندنا نفس الدماغ.. او حل اخر ان احنا بنحب مصر .ههههه
    هههههه
    فلقد كتبتى عن تقرير وزاره الخارجيه الامريكيه فى نفس الوقت الذى كتبت فيه انا عند احمد بيه العبيط..
    واليوم تكتبن عن الدستور الذى طالا بحثى عنه..

    الدستور موجود فى مكان ما لكنه غير مطبق ..لو قرأتى الدستور ع الورق تحسى انك عايشه فى الجنه ونعيمها..
    وتحت كل فرع من فروع هذا الدستور اللعين..تجدى تعديلات فشر تعديلات ترزى فى بدله عسكرى امن مركزى..

  2. BlueMagnifier says:

    اسمحيلي أجاوب الأول عن سؤال الحلقة
    الدس – تور هي كلمة مكونة من شقين ، الدس هو نظام تشغيل قديم , و التووووور طبعا غني عن التعريف

    —————————–
    فعلا عندك حق ، قال يعني الدستور مقطع بعضه
    أكتر حاجة تضحك في المعارضة المصرية انها انفعالية و قائمة على ردود الأفعال فقط
    عمري ما سمعت عن تحرك للمعارضة إلا في شكل رد فعل لقرارات السلطة

    من الآخر ، اياكش اتولع

  3. karakib says:

    ايه ده !! انت كاتبه عن الدستور
    بكل صراحة و وضوح
    أنا ما أعرفش الدستور بيقول أيه
    و بيقول أيه و ليه
    أنا عارف طبعا الهدف من الدستور و انه القوانين بتتشرع علي أساسه
    لكن الكدب خيبة كل اللي أعرفه أنهم 34 مادة و كل ما حد يتكلم عن تعديلهم في مقالة في جرنال الاقي كلمات بتزغزغني و تموتني من الضحك من عينة الديمقراطية
    المواطنة ارفعوا ايديكم عن مهزلة
    السلطة التنفيذية الطواريء
    كلام كبير كبير يعني

    و أعرف أنه في أستفتاء شعبي يوم 26 في ناس هاتقاطعه و في ناس هاتروح تقول لا
    و طبعا الأغلبية الصامته اللي رهان المعارضه و الحكومه و ام بيومي ذات نفسها عليها هاتقعد ساكته
    و انا من الأغلبيه الصامته الخارسه دي اللي بيراهنوا عليها دايما

  4. ahmad says:

    و الله جدعة
    أنا كنت عايز أقول الكلمتين دول بس مكسوف
    كنت حاكتبهم عندي ، بس أديكي عملتي الواجب

    دستور إيه صحيح؟

  5. يا مراكبي says:

    أسوأ حاجة بأعاني منها إني لسه حاسس إني مصري وإني هأرجع لمصر في يوم من الأيام

    لو حصل وقررت الهجرة وأخدت جنسية تانية ولغيت فكرة إحتمال الرجوع دي .. أكيد هاستريح كتير

    على الأقل مش هايجييلي ضغط وإستبحس لما أقرأ بوست زي ده

  6. ibn nasser - ابن ناصر says:

    صدقيني هذا هو الدستور الذي سنعيش به مدي الحياه فالا يتم العبث به وادخال النصوص السالبه للحريات وشرعية الدوله البوليسيه وبالنسب لموضوع الثوره اللي بتقول عليها صدقيني هتيجي والله ما يجري الان اعاده للتاريخ حكاية البوليس اللي يقدر يعمل كل حاجه -البوليس السياسي زما- والتوريث والملكيه والغاء كل ماله علاقه بالاشتراكيه ورجوع الباشا للارض واخذها من الفلاح بالطريق الدستوريه الان والخصخصه دول خصخصوا كل حاجه في البلد البلد عايزه تأميم تان مش شايفه أي تشابه خالص , خالص وانا كنت اظن ان الناس عمرهم ما هيعملوا حاجه تعالي شوفي البوست بتاع نهر الغضب عندي شوفي الفيديو شوفي الناس عموا ايه اما اعلنوا الغضب ,, يا ريت تشوفيه
    وتحياتي

  7. ibn nasser - ابن ناصر says:

    تصدقي قعدت اكتب في الموضوع ونسيت اشكرك علي البوست ده
    تحياتي

  8. ahmed says:

    مقال جميل..شكراَ

  9. حاجات ومحتاجات says:

    كلامك صحيح يا بلو
    لكن النقطة ان بعد التعديلات الدستورية دي التخلف الحكومي هيكون قانوني
    محدش هيطلع يدوش دماغهم ويقول لهم بتعتقلوا ناس بدون تهم لية والدستور بيقول كذا ويبقى منظرهم يكسف. دلوقتي اي معترض هيقولوا لة كلة بالدستور يا حبيبي!!
    يعني حتى الاعتراض هيكون غير شرعي!!

  10. Anonymous says:

    دستور ياأهل الدار ..جماعه ياللى هنا.. ياهووووو…هو الناس فى مصر -فى المدن قبل القري والنجوع ..فى الوادى …بحرى أو قبلى ..فى البر ، البحر أو الجو – عارفين هم عايشيين ليه أصلاً؟ ياحضرت أنتم بتنفخوا فى قربه مقطوعه والخرم فيها أكبر من إتساع نهر النيل عند الجيزه… ياحضرات الساده إلإلهام فى مصر فقط من مهام الرؤساء… يعنى فرعون … يعنى أللآه …مطلع الشمس والقمر …منشف الرييق ومُطعم العبيد…

    أجيب منيين ناس تفهم وتلف البلد تفهم اللى مش فاهم,,,,,, سلملى على القمع المركزي

  11. Iskanderani says:

    فقط اود ان اقول لله يازمري
    هذا ما يمكن ان ينطبق على الموضوع

    شكراً على العرض الجميل لمدي الجهل فى مصرنا كلنا

    تحيات إسكندرانى فى بلاد الله الواسعه

  12. bluestone says:

    المٌهَــــاجِر المَصْـــــــرى
    ههيهيهي
    اتفق معك تماما ان الدستور موجود في كل مكان ولكنه طبعا غير مطبق
    لا يوجد مصري واحد يعرف اي شيء عن الدستور

    طبعا .. ترزية القوانين في مجلس اللعب في القوانين
    وبرضه اللعب في القوانين أحلى من قزقزة اللب🙂
    ———————-
    BlueMagnifier

    اهو موقف المعارضة اكتر حاجة غايظاني في الموضوع كل اللي بيحصل هو تقنين لوضع قائم فعلا
    وبعدين من امتى يعني القانون بيطبق
    طيب روح كده لاي امين شرطة ساحب مواطن من قفاه واسأله اذا كان ده قانوني ولا لأ. …
    وشوف رد فعله هيكون ازاي؟؟؟؟
    بس وحياة الغاليين عليك يا شيخ ما تقولش اني انا اللي قلت لك …

    ————–

  13. bluestone says:

    على فكرة يا blumagnifier
    انت جاوبت من بره المنهج
    يعني تتحمل النتائج كاملة عن اجابتك
    واضح اننا شغاليين بنظام بهايمي وقدييييم كمان …
    بس برضه مش هتربح جائزة الفقرة
    لانك قلت نظام
    ودي كلمة مش موجودة في القاموس اصلا

  14. bluestone says:

    كراكيب:
    طبعا مش هتلاقي غير كلام من عينة
    التعديلات لاجلك ولاجل بلدك
    صوت لاجل دستور بلادك
    الديموقراطية والاصلاح
    القيادة الحكيمة وسفينة مصر المباركة …وكام كلمة بتاع

    ده غير الدبش بتاع هتافات المعارضة اللي لا بيودي ولا بيجيب ..
    ألا ما حد نفض ايده وطبع كام ورقة ووزعهم على الناس عشان يفهمهم يعني ايه دستور ويعني تعديل
    من غير كلام مكعور ومصطلحات من اللي بتنفخ الكلام تمهيدا لنفخ صاحبه

  15. bluestone says:

    ahmad:
    الله يكرمك يا احمد
    ومكسوف ليه …
    لا لا لا
    ده انت تقول اللي انت عايزه
    احنا في ازهي عصور الديموقراطية المزهزهة
    والبركة في إريال

    —————————-
    يا مراكبي:
    سلامتك يا فندم من الاستبحس
    مش عايزين الحاجة تدعي علينا
    بس للاسف بعد اللي بنقراه كل يوم وبنسمعه
    خلاص الواحد لازم يعيا
    واللي بيوجع اكتر ان الناس في الشارع ولا هي هنا ….
    بينما النخبة تناضل من البلكونات
    —————————-
    ابن ناصر:
    زيارة أولى .. منور أولا
    هو كان فيه دستور اولاني لما يبقى فيه تاني
    التعديلات دي جاءت لتقنين وضع قائم
    يعني مفيش حاجة هتتغير
    كل ما هنالك انه كله هيبقى بالأنون.


    هختلف معاك اسمح لي في مسألة الثورة دي
    في ردي على تدوينة عن الموضوع ده قلت ان قيام ثورة أخرى امر مستحيل لاسباب كتير
    منها ان النخبة منفصلة تماما عن الشارع ولا تملك ابجديات ولا آليات خطاب الشارع
    يعني من الاخر لا يمكنها التواصل مع رجل الشارع العادي بلغته او تفهمه ما يدور حوله وكيف تؤثر القرارات السياسية داخليا وخارجيا على قوت يومه
    اضف إلى ذلك المد الديني المتشدد وغياب الوعي وضعف مستوى التعليم
    وعوامل تانية كتير

    انت على حق في وجود تشابه في الحالة العامة .. فنحن انتقلنا من الملكية الي العزبة الجمهوركية

    جاري الانتقال السريع لمتابعة الفيديو
    ——————-

  16. bluestone says:

    أحمد:
    اشكرك على الزيارة
    ————-
    حاجات ومحتاجات :
    شوفي رأي ان التعديلات ما هي إلا تقنين لاوضاع راهنة
    يعني مثلا احد المواد اللي هتتطبخ ..قصدي هتتغير هي السماح لرجال الامن بالتفتيش في المنازل واعتقال الاشخاص والتصنت على الاتصالات دون الحاجة لاذن نيابة ..

    طيب قوليلي يا شيخة بذمتك
    لو جالك (بعد الشر يعني) احد السادة حماة الوطن الساهرين على الامن وقال لك
    هنفتش بيتك مثلا او تعالي معانا مشوار للقسم … (بعد الشر يعني)
    تقدري تقولي حاجة .؟؟؟؟؟
    قبل او بعد التعديلات؟؟؟
    تقدري تسأليه معاك اذن نيابة ولا لأ؟؟؟؟

    صديق حكا لي قصة .. شاب مصري وارد الخارج .. قصدي يعني كان عايش بره مصر وفي احد الايام كان يسير في احد الشوارع في وقت متأخر فقابلته الدورية وبعد شد وجذب قرر البيه الظابط القبض على الشاب (عشان يتربى) في القسم .. ولما الولد بمنتهى حسن النية قال له معاك اذن نيابة .. رد الباشا (اذن ايه يا روح امك .. انت فاكرنا في شيكاغو؟؟)

    وكله قبل التعديل

    وبعدين هو من امتى كان الاعتراض على اي حاجة هنا شرعي؟؟؟؟

  17. bluestone says:

    ANNON:
    ما احنا عارفين يا عم ان الناس في وادي تاني خالص وكل سنة وانت طيب من زمان
    بس حلوة قوي
    منشف الرييق ومُطعم العبيد دي .. وماتنساش اللي سامح لهم يعيشوا في العزبة ويتنفسوا كمان
    احنا هننهب
    كله إلا السادة الساهرين على أمن الوطن
    وحياة الغاليين عليك يا شيخ
    انا من منبري هذا اوجه اقوى واعظم تحية للسادة الساهرين .. واناشدهم يناموا بدري عشان صحتهم

  18. bluestone says:

    اسكندراني ::
    منور على الزيارة
    بس مين زمري ده؟

  19. tota says:

    بلو ستون
    انا عارفة الكلمة دى علشان درسناها زمان فى مادة اسمها التربية القومية او الوطنية
    بس بعد كده كنت بسمعها بتتردد فى ارجاء البرلمان ومعاها صيحات وخزعبلات لكن فى الحقيقة مش عارفة ايه اللى كان مكتوب فى الدستور ده
    لكن تغييره مستفز فعلا لانه مش ملكية شخصية بقى حتى لو مش عارفين ايه جواه يحق لينا حسب نص الدستور اننا يكون لينا حق رفض تغييره ما دام هيطبق علينا
    بس الحمد لله عرفنا ايه النصوص اللى هتتغير بدل ما كنا مش عارفين خالص
    و ادى عيب المعرفة شوفتى يا ستى لما عرفنا اتجننا ومش عاجبنا ولما كنا مش عارفين حاجة كنا راضيين وساكتين يظهر لو دورنا عن اصل الدستور ده كنا هنلاقى العجب
    والله كلامك صبرنى على الهم
    تحياتى

  20. Gid-Do - جدو says:

    بلو ستون

    كتبتى تقولى

    مهزلة الدستور هذه ذكرتني بمسرحية عادل امام شاهد ماشافش حاجة حينما دفع فاتورة التليفون (احسن يشيلوا العدة) مع انه معندوش تليفون . هذا يا سادة ما نفعله بالظبط خايفين لا يشيلوا العدة مع اننا معندناش دستور قصدي تليفون .
    . هل يملك أحد الجرأة ان يقول لي ان الدستور مطبق في مصر ؟؟؟؟؟ وان المسؤولين يحترمون هذا الدستور ؟؟؟؟ ألا نقرأ كل يوم عن تصرف أو فعل أو تصريح ما “يخالف الدستور” مخالفة واضحة لا يخطئها عاقل . طيب فين المشكلة إذن؟؟؟؟؟؟
    ———–
    بصراحة ملقيش كلام ابلغ من كلامك ـ خايفين يشيلو العدة رغم ان احنا معندناش عدة تليفون من الاصل

    والاجابة على سؤالك ان من الناحية العملية والتطبيقية على ارض الواقع مفيش مشكلة ـ وسيد بنجر اللى خطيبتة مش عجبها اسم بنجر طلبت منه يغير اسمة والا تفسخ الخطبة ومن غير ما يسالها عن انه اسم فى اسمه مش عاجبها راح بغبوتة غير اسمة الى على بنجر

    اشكر تشريفك مدونتى وتعليقك عندى هو اللى جابنى هنا وان شاء الله حاجى ابص من هنا ورايح ـ الف تحية على البوست الحلو دة وكفى انك خلتينى اضحك من قلبى بجد ـ تحياتى

  21. أُكتب بالرصاص says:

    تحياتي

    على الاقل
    الاون كان الناس بتعترض وتقول لك
    ده مخالف للدستور

    لكن دلوقت

    ماحدش هايقدر يفتح بقه

    ما كلو بالدستوووور

    كله شرعي وقانوني

    دولة النفخ الدستورية

  22. أُكتب بالرصاص says:

    نسيت احييك على المقالات المتحفة الرائعة

    انا متابع من زماااان

    بس مقل في التعليقات

    تحياتي مرة اخرى

  23. بعدك على بالى says:

    عزيزتى

    دخلت كالعادة عند جدو العزيز لقيت بوسته عن الدستور وفى اشارة لتدوينتك، لقيتك قايله نفس اللى علقت بيه عند اكتب بالرصاص… فعلا نفسى حد يفهمنى هم عاملين كل المسرحية دى ليه ؟؟؟ ماهم شغالين الله ينور ومش منتظرين لا دستور و لا يحزنزن …

    تحياتى على دماغك العاليه

  24. Rozza!.......فاقد الذاكرة says:

    السلام عليكم
    الدستور هو شيء ابتدعه بعض السكرانين ايام حرب الشلاليط “ايام زمان” وهذا الدستور عبارة عن شوية اوراق هدفنا مخالفتها وليس العمل بها, نعم مخالفتها, لانها موضة قديمة اصبحة عادة.
    فقد كانوا ايام زمان يعملون الدستور ويسيرون عليه, اما الان فيجدون عكس ما يريدون فعله ويكتبونه, وذلك تبعا على مقولة
    خالف تعرف
    سلام

  25. Utrechty says:

    Bluestone,

    I believe this post have just expressed the views of many of the “Silent Monitors”

    As they say “El genazah 7arah wel mayet kalb”!! With all my respect to dogs . .

    Thanks for being there!

    Utrechty

  26. دينا فهمي says:

    بجد انا محتارة جدا
    ومش عارفة التصرف الصح في الموقف اللي احنا فيه ده ايه
    أروح الاستفتاء واقول لا
    وللا اقاطعه خالص
    ربنا يعمل اللي فيه الخير بكرة

  27. bluestone says:

    توتا
    نجمة التدوين المعتزلة مؤقتا🙂

    بصراحة انا مش عارفة كانوا بيدرسوها في التربية الوطنية ولا لأ
    اصلي بيني وبينك عمري ما حضرت ولا حصة من بتوع التربية الوطنية دول
    طول عمري شايفة ان الكتاب نفسه كله عك ونفاق ومسخرة
    اما مدرسينه بقى .. فحدث ولا حرج

    تخيلي واحدة فاضلة تدخل الفصل عشان تكلمك على الانتماء وهي شكلها يضحك وهيئتها مشقلبة وبتتكلم بمنتهى البرود وعدم الاهتمام وماسكة في ايدها ابر التريكو .. حد بيتكلم عن خرافات هو نفسه مش مقتنع بيها

    اما البرطمان .. انا بحب اتفرج عليه موت موت موت
    بحبهم قوي وهما نايمين او بيضربوا بعض بالجزم … حاجة أوريجينال خالص .. مسلية اكتر من اللمبي

    على فكرة بقى .. الكلام ده مش صح يا توتا عمالة تقولي يطبق علينا وبتاعنا وملكية … يا سلاااااااااام
    طب انزلي هاتي الدستور من الازبكية ب9 جنيه .. هو ده الحاجة الوحيدة الدستورية اللي بتاعتنا
    وبعدين ابقى بليه .. واعملي عليه خشاف …

    احنا مفيش حاجة بتاعتنا اصلا في العزبة دي .. احنا يا دوبك انتقلنا من مستأجرين قبل التعديل لعبيد بعد التعديل … وكله بالقانون

    وككل الشاعر الخالد اللي اسمه مش مهم
    اديها على الأنون … قسم .. وادي كل واحد حتة

  28. bluestone says:

    جدو يا جدو
    منور يا جدو
    اللي بيحصل في بلدنا ده .. حالة من العبث الكامل …

    اول مرة في حياتي اشوف الاجرام مقنن .. بلطجة بالقانون
    ده ايه الريادة دي يا ربي … هو احنا دايما كده متفوقين في كل حاجة
    ريادة مصرية صميمة

    اللهم صبرنا ..وسامحنا

    انت منورنا يا جدو
    وتتفضل تشرب شاي او حاجة ساقعة حضرتك جاي من بعيد برضه …

    والمشاريب على حساب صاحب المخل
    بمناسبة التخليلات والتهريجات الدستورية

  29. bluestone says:

    اكتب بالرصاص
    اشكرك اولا على التشريف
    ومنور
    ثانيا تعالى براحتك
    مش مهم التعليق .. المهم ان الكلام يكون بيأثر فيك او بيضيفلك حاجة زيادة
    ده في حد ذاتك امر رائع بالنسبة لي.

    صحيح …
    دلوقتي بقى كله بالقانون
    يعني بلطجة وقهر مقنن
    ودي ريادة عالمية
    دي حاجة محصلتش قبل كده

  30. bluestone says:

    كتب بعدك على بالى
    افتكر ان المسلسل البايخ بتاع الاستفتاء ده .. منظر .. حركات يعني
    عشان الشكل القانوني .. اصل بلد بتاعة حركات .. نموت في المنظرة

    تحياتي ليكي
    وتنوري في اي وقت

  31. bluestone says:

    فاقد الذاكرة .. رزة
    اهلا وسهلا .. منور
    ويارب تعرف تلاقينا تاني

    حرب الشلاليط .. حرب الشلاليط ؟؟؟؟
    مخدنهاش دي في تالتة اعدادي …
    كانت امتى دي؟؟

    -احنا نخالف الدستور؟؟ احنا ؟؟
    هو احنا اصلا نعرف يعني ايه..؟؟
    ولا معانا حاجة نخالف بيها
    ده نص البلد بتسأل الله في حق النشوق
    والباقي ماشي جنب الحيط

  32. bluestone says:

    دينا فهمي:
    رأيي انها للاسف مش هتفرق مرواحنا زي عدمه
    النتيجة طلعت من الكنترول من بدري

  33. Nah·det Masr says:

    كلامك مضبوط مية في المية! الحكومة لما مبتحبش تحترم الدستور، بتقوم ضارباه بالجزمة، فمش فارقة!

    الفريق الأكثر نباحاً هم الأخوان الأظلاميين؛ هما فاقعهم فقرتين؛ الفقرة الأولى لأنها بتنص على حق المواطنة وتساوي المواطنين في الحقوق والواجبات، والمتحدث بتاعهم طلع في التلفزيون وقال نحن نرفض المواطنة لأنها كلمة “مطاطة”… والفقرة الخامسة بتاعة منع الأحزاب والدعاية السياسية على أساس ديني.

    وعلشان كده، انا صوتي مع التعديل الدستوري.

  34. قنديل في قلبي says:

    إيه هوه الدستور
    ليه نكشف المستور
    ونزعل حسني وسرور
    ده حلة سخنة علي وبور
    بيطبخوا فيها الأمور
    ويشووا بيها الضهور
    ويعكننوا بيها عالمسرور
    دستور منهم دستور
    داهية تاخدهم وتغور

  35. bluestone says:

    نهضة مصر:
    شوف الحكومة حبت تظهر للعالم وللناس انها تستهدف الاخوان وحدهم ..
    لكن صدقني الواقع مش كده
    لو انت قاعد في بيتكوا وطب عليك بعد السادة الظباط وراحوا ساحبين سيادتك بمنتهى الاحترام على القسم بعد تفتيش بيتك وقالبه عاليه واطيه (بعد الشر يعني)
    هتقدر تفتح بقك وتقول اذن النيابة فين؟؟؟؟ بأمارة ايه؟؟؟؟

    ده كان زمااااااااااااااان
    دلوقتي ماتقدرش وكله بالقانون

    الاخوان المجرمين الاخوان المتواطئين … انا مش معاهم كما هو واضح .. لكن كمان مش معى كتمان الحريات وتكميم الافواه اكتر ما هي مكتومة
    البلطجة دلوقتي بقت بالقانون يا عزيزي

    عشان كده انا مختلفة معاك ..
    مش عشان حرامي مش عاجبني اقوم اتحالف مع حرامي تاني …… السرقة كلها وحشة ….
    وعلى العموم النتيجة طلعت في الكنترول .. ومعروفة من قبل حتى ما التعديلات تتناقش.
    ————

    قنديل في قلبي:

    داهية تاخدهم وتغور
    بالظبط كده
    عشان الطبخة صايصة وطعمها وحش
    وقربت تعفن كمان

    واحنا استوينا على الاخر

  36. Iskanderani says:

    يامساءالفل,

    انت ماتعرفيش الراجل أبو ذراع اللي ماسك المزمار وعمال يعزف فى بلد كله صُم وبُكم لكنه لم يكن يعلم ولما أكتشف الحاجه دي قالها لله يا زمري علشان لاحد سامع اصلاٌ ولا حد فاهم حاجه من العزف

    مرة تانيه برضه صدفه حااحول افتكر اسم البلد دي أيه؟؟؟ لما افتكر راح اطلب قهوه وآجي أقعد جنبك نسمع
    المزمار مع بعض في القهوه على الناصيه

    تحيات إسكندراني في بلاد الله الواسعه

  37. bluestone says:

    اسكندراني:
    يا قهلا يا قهلا

    تنور في اي وقت .. ونقعد كلنا على الحيطة ونسمع الظيطة
    ونطلب شايات وقهاوي
    من هنا للصبح

    منور ومنورين كل اهل اسكندرية اللي بموت فيها

  38. minesweeper76 says:

    الله ينوّر.. فعلا كل ما كنت أقرا المقالات عن التعديلات، سواء من كتبة النظام أو كتاب المعارضة، أفتكر نكتة الإتنين قُرع اللي بيتخانقوا على مشط

  39. أحمد الضبع says:

    test

  40. عشقك ندي says:

    المسألة باختصا اننا مش عايزينهم يقننوا اوضاع هيما اه فعلا بيعملوها ومحدش بيحاسبهم بس فيه فرق انك تكوني راجعة الساعة اربعة الصبح من الديسكو وبابا مانع الكلام ده وتكوني خايفة وبتفكري حتقولي ايه وان بابا اصلا يكون فرييييييي ومش بيدق ساعتها الحكاية مش حتبقي فارقة
    احنا مش عايزين نبقي فري معاهم لأن ساعتها ممكن بسبب شوية كلام زي اللي انت كاتباهم تروحي ورا الشمس ويبقي ميري ورسمي وكله بالقانون
    ملحوظة لماذا هذا التحامل علي ابراهيم عيسي طبعا كل حر في رأيه بس حتي الكلام مستكترينه طب ايه نسلم يعني نقولهم خدوها ببلاش من غير دوشة نقلع لهم ونقولهم اعملوا فينا اللي انتوا عايزينه ايه المطلوب الدستور هو العقد اللي بين الدولة والشعب لو مااتعملش مظبوط يبقي باطل زي فؤادة وعتريس ترضي حد يجوزك بعقد باطل
    وشكرا

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s