>تعذيب ترفيهي

Posted: 13/06/2007 in Uncategorized

>ساقتني الاقدار … بالغصب وبالاجبار
لمشاهدة تلك التوليفة
اللي عاملة زي السلطة من غير خيار
وهي بعيد عنكم وعن السامعين والقارئين والمبلوجيين
عمر وسلمي
لابن مصر البار
الهارب من الجندية ومزور الشهادات العسكرية
تامر حوووووسني
وفاتنة الشاشة الركيكة
التي تختصر التمثيل في زم الشفايف
عقد شعرها بوني تيل
خريجة معهد التنهدات قسم دموع وآهات
مي عز الطين

طبعا قبل ما اي حد من القارئين تسول له نفسه ان يقولها لي .. انا هاقولها لنفسي .. انا اللي استاهل كل اللي يجرالي
ولكن يعلم الله اني شاهدته مجبرة لاسباب لا مجال لذكرها الآن
.
.
كان يجب أن اتوقع ما انا مقبلة عليه
فمشاهدة فيلم لتامر نجم الجيل ورمز الشباب الوتني المسري امر معروفة عواقبه
ولكن ان يقتادك بعضهم لمشاهدة فيلم

من بطولة تامر حوسني
.
.
وتأليف تامر حوسني
.
.
وغناء تامر حوسني
.
.
وتشاركه الركة والركاكة
.
مي عز التين البرشومي اللي بكرهه
.
.
وان تبدأ أول لقطة في الفيلم بصوت
.
محطم قلوب العذارى
.
خبير العواتف
.
أسامة منير
.
.
فده كتييييييييييييييييييييييير
أوفر
أوفر
خالص بصراحة …..

.
للاسف تلك كانت الحقيقة المرة
الفيلم من بطولة وقصة وغناء تامر حسني .. والقصة عاطفية خالص من النوع الملزق تبدأ على صوت اسامة منير في عيد الحب
.
وهنا تحضرني بعض الالفاظ البذيئة التي لا استطيع نطقها
.
الفيلم تم سلقه في استعجال بمناسبة خروج نجم النجوم .. فخر الشباب المصري .. كفارة يا تامر
وهو بصراحة كنجم يعني لم يستخسر اي شيء في محبيه وعشاقه من البنات الأمامير والشباب الكووول من عشاقه ومحبيه
حيث قام الفنان المشهور طوال الفيلم باستعراض طقم كامل من (البوكسرز) بألوان مختلفة
واستعراض سعر صدره بمختلف الاوضاع مع التأكيد على شدة عضلات البطن وقوة عضلات الذراعين
.
كما قام بغناء نص اغاني الالبوم الجديد
بصراحة عداه العيب …

كما ارتدت الست مي عس التين الكثير والكثير من الهدوم الموضة
واستعرض طاقم الممثلين في الفيلم مجموعة من السيارات الفارهة لتصوير حياة طلبة الجامعات في إطار من الواكعية الرومانسية
.
اي حد بعد كل المجهود ده يتجرأ ويسأل على القصة والسيناريو والحوار والحاجات الوحشة دي
هيعاقب بمشاهدة الفيلم
مع فصل تالتة تالت
مدرسة الزهراء الثانوية بنات

ألا أراكم الله يوما كهذا
سيظل علامة سوداء في تاريخ زياراتي للمدينة الأجمل في الدنيا
الاسكندرية
تلك الأنثى المجنونة
التي احبها

Comments
  1. karakib says:

    >تامر حسني … امممم مش موافق واضح انك من الناس اللي بتكرههانت من اعداء النجاح عارفكم انا تامر حبيب الملايين انت بتتريقي عليه انت من القلة المارقه المندسة علي الفيلم ايه يعني واحد عنده عربيه هامر و اربع بي امات و واحدة ما عرفتش ماركتها و لما حبيبته بتسيبه بيقعد فالجاكوزي اللي فيه سماعات مزيكا مش فاهم ايه اللي يضايقك يعني ده حقد بقي تقريبا و لعلمك بقي هو عنده بوكسرات اكتر من كده بكتير و عربيات كمان بطلوا حقد بقي علي الشباب الواعد مليتوا البلد !! :~~~~~~~~~p

  2. >وبعدين واحد حبيبته سابته يصيف لواحده في ماريناقوم لقي تلاتين بنت تانيين بس برضك كان زهقانفراح عامل اغنية سمعها تلاتة مليون عيلفعمل ثروةفافتتنفساب الجيشفغني لمصر في عيد الثورةوغني للدين في دعوة للتعايشوغني علينا كلنايبقي ليه بقي تزعلي؟:)))

  3. >بلوستونشوفى يابنوتة انتىيشتهر الامريكان بانهم بيحبوا ويعزوا ويموتوا على اكلة ببلاش ـ ومش مهم انها تكون حاجة كبيرة. بسكوتة ماشى قهوة ما يضرش ـ ودة مش من الفقر ابدا دة نوع من ثقافة او عادات الناس يستوى فى ذلك اللى معاة كوم فلوس مع اللى معاة كومين ولا تلاتهوبناء علية اقدر اقول انك رحتى الفيلم لانه كان عزومة ببلاش ـ زى الامريكان كدة ـ وخسرتك يابطنى ولا دلق الطبيخودة جزات اللى ما يسمعش كلام ممته ـ تحياتى

  4. >لأ ده كدة كتير فعلاوبعدين لا مبرر على الإطلاق لمشاهدة مثل هذا المقلب… بحاول أتعاطف مع حالتك بصراحة بس مش قادر… أصلك بصراحة تستاهلي… يعني إنتي المفروض فوق السن القانوني وتنطبق عليكي القاعدة الفقهية الشهيرة “هو كامل السن اسألوه” يعني مالكيش حجة!!! داخلة فيلم مكتوب ع السينما من برة بطلوة مي زفت الطين والشاب أبو شعر في صدره تامر حُزني ده وبرضه مازلتي مصرة على ارتكاب الحماقة إلى نهايتها.. يعني أنت بلا عذر أيها الإنسان… ما كان قدامك تهربي ف الاستراحة أو تجري وتسيبي العيال اصحابك في نص الفيلم لكن انتي استعذبتي حفلة التعذيب بتاعتك وكملتيها للآخر… يبقى على نفسها جنت مش عارف مينتحياتي وتعزياتي الحارة

  5. bluestone says:

    >كراكيب:طبعا منتهي الواكعية .. ان اي شاب في مصر عنده هامر ولما يزهق يسوق البي إم في الفئة التاسعة .. ولما يتضايق بسلامته يروح يعتكف في شرم ,. او ينزل الجاكوزي .. ولما يتخانق مع باباه يرميه في حمام السباحة بتاع الفيلا بتاعته .. طبعا .. واصحابه اللي بيجوا الجامعة بتاكسي يبقوا بيئة .. تقريبا هو حقد فعلا … وعلى فكرة في شائعة بتقول ان تامر بينشن على سلسلة اعلانات ماركة بوكسر عالمية .. وكان بيثبت قدرته على الحصول على عقد الاعلان .. وده بقى سبب الفيلم أصلا ..🙂 هو حقد برضه

  6. bluestone says:

    >هو فعلا بيغني علينا من زمان طبعا فخر شباب الجيل اجدر واحد يمثل مصر وشبابها فعلا .. اللي بيغيظني بجد يا بن عبد العزيز ان الناس بتنسى او بتستعبط او مش واخدة بالها .. يا راجل لما العيل الملزق ده يتعمل له مظاهرة لما اخد حكم في مسألة مخلة جدا وهي التهرب من الجندية .. يعني تزوير وكمان جبن وقلة رجولة .. وفي الاخر يروحوا يهزوا طولهم ويشيلو صوره ويعيطوا عليه على باب المحكمة دي حاجة تفلق

  7. bluestone says:

    >جدو:لا ياجدو يعلم الله مكنتش عزومة ببلاش ابدا .. بالعكس انا كعيت من جيبي وعزمت ناس كمان كل الحكاية اني كان معايا مجموعة من الشباب صغير السن في العيلة .. وصمموا كلهم ندخل الفيلم المؤذي ده .. فمرضيتش اصمم على رأيي بس الطبيخ طلع صايص خالص

  8. bluestone says:

    >مراقب:صحيح انا اللي استاهل ونص كمان بس الموضوع كان فوق ما احتمل يا مراقب الفيلم قعلا عقاب لكل من تتحكم فيه رقة قلبه وذوقه واحترام آراء الاخرين .. تقريبا دي ماسوخيزم على كبر بقى ولا ايه .. انا طول الفيلم كده بعض على سنان واصابع ورجلين وايدين الندم .. وبتحسر على الفلوس اللي دفعناها

  9. shaimaa says:

    >تامر حوسنيانا علمتك كده بقي دي افلام تتدخلامال اوشن 13 دا يتعملو ايييهعمومااا معلش بقي غلطه

  10. zenzana says:

    >انتوا ايه حكايتكم معايا النهاردةكراكيب وانتى الاقي سي حوسني وبنت زفت الطين؟وكمان اتعزم النهاردة ع الفيلم نفسه؟لا شكلي هعزل م البلد دي بس لالالا انا طلعت اشطر منك اتعزمت عليه بكرة الخميس بس زوغت يا مامالا هو انا نخورت وراه وعرفت انه منشن علي نوع شامبو لشعر الصدر بسسي حوووووسنيييييا حلاوته كدة وهو بيدحرج علي المسرح زي انبوبة البوتاجاز توب علينا يا رب من الانبوبة وسهلها بالغاز الطبيعي بقي

  11. The Alien says:

    >إنتي اللي عملتيها ف نفسكتستاهليتحياتي

  12. Misho says:

    >ما اللى يعدّى الكوبرى مالوش ديه. و اللى يشوف فيلم كده برضه مالوش ديه.فعلاً فعلاً ملكيش أى حجة و تستاهلى كل اللى شفتيه ده :)شكراً للتحذير و لو إنى كده كده مش هحاول أكون فى الموقف ده :)بس يا شباب برضه خلو بالكو من الكلام – على الأقل فى أساميهم – و إشتموا زى ما إنتو عايزين فى الفيلم و التمثيل و القصة و غيره.

  13. ربيع says:

    >بلوستونأخيرا حد يشاركني الخنقة من الثنائي الخنيق ، تامير و مي ، تصدقي أنا عايز أدخل الفيلم عشان اطلع أشتم فيه بقلب جامد؟

  14. bluestone says:

    >theAlien:هو انا فعلا استاهل بس كان غصب عني وآخر مرة اعملها. آدي آخرة اللي يطلع ذوق مع قرايبه——Misho:اهلا بيك اولا عشان دي اول مرة تقعد على القهوة عندنا .. منور .. :)) نصيحة أخوية بريئة صادقة آرجوك لا تذهب لهذا الفيلم الا لو ناوي تتغاظ ————–ربيع: منور وانظر النصيحة أعلاه لميشو

  15. >شكراٌ على التحزير رغم أن في ظروفي الراهنة معنديش فرصة والحمدلله لمشاهجة مثل تلك الأفلام، لكن على آي حال شكراً عشان الواحد يأخج أحتياطه في المستقبل…

  16. karakib says:

    >انا ملاحظ انه اعداء النجاح اعدادهم في تزايد يوم بعد يوم !! شيء مؤسف

  17. >السلام عليكم ورحمة الله وبركاتهاول زيارة لمدونتك بس الوان البلوجوالثاقفة الى فية خلتنى استغربتامر حسنى؟؟؟حد يخش فيلم لتامر حسنى؟؟شوفى يا بنتى انتى كدة عملتى عذاب نفسى غير طبيعىانا مشفق عليكى بجددة ولا انتقام الكونت دى مونت كريستو من نفسة اصلابس بجد انا مقدر موقفك لانى دخلت فسلم الرائعة يسرا بعد ما اتهبلت فى رائعتها ما تيجىى نتهبباستمتعت بساعتين من النوم الزيزومش ندمان تعرفى الاخ تامر حسنى فى حفل عيد الام فى جمعية رساله جابوة وكدةصحيح انا مروحتش واعلنت مقاطعتى بس حكولى على المهزلة وبالنسبة للبوكسراتفهو زباله هاتعملى اية يعنى ومى انا بحبها لان فيها امل شوية يعنىبس ربنا اكيد ليه حكمة منة تعذيبك كدةوهاتعرفيها مع الايام

  18. Amr Ahmed says:

    >ههههههههههههتامر تانيالظاهر انه بطل المدونات اليومين دولانا كاتب بوست عندي عنهابقي شوفييييييييهبس حاسبي علي نفسك

  19. bluestone says:

    >THE EYEWITNESSحمد لله على السلامة ..فينك من زمان .. منور برضه .. طبعا التحذير من القلب وصادق جدا .. واتمنى الظروف اللي مانعة دي تكون خير ——————————–زنزانة:انتي تنوري كل مكان برافو عليكي انك زوغتي .. بس تعملي ايه بقى لو انتي اللي عازمة مش معزومة؟؟🙂 حلوة انبوبة البوتجاز دي :))))) اتمنى انها تنحرق قريب .. مش هتصدقي حالة الهوس الشبابي يالعيل ده .. الولد ابن خالتي عنده 16 سنة كل ما اتكلم عن الزفت ده .. يقوللي لأ ما تتريقيش على جاري .. ده تامر .. عيب عليكي … …؟؟؟؟؟؟

  20. bluestone says:

    >الغزالي:منور أولا على أول زيارة وفي انتظار تكرارها معلش حضور الفيلم كان ليه ظروف خاصة جدا غصب عني فعلا تقريبا كان نوع من السادية .. اما بالنسبة ليسرا.. فهي بالنسبة لم تكن رائعة ابدا في اي وقت من الاوقات .. اكره تصنعها المبالغ فيهوالحمد لله انا فلت من فيلم ما تيجي نستهبل مي كمان بتنتمي لمدرسة يسرا في السهوكة وادعاء البراءة والتصنع .. —————— عمرو احمد:واضح انه تسبب في حالة عامة من الاندهاش في المدونات

  21. >للأسف وجهتك نظرك دى وجهة نظر شخصيى انا عامة بعترف بمى عز الدين دى تعمل الى هى عايزاه تغنى ترقص تعبط تهبل تمثل هى حرة لهيطة شرقية تمشى الهوينى كما يمشى الوجى الوحل فاهمانى ولا لأ لكن انا لا اعترف بمستر سماجة الى اسمه تامر حسنى لكن مى يا روحى عليها سيبوها تعبط زى ما هى عايزه ربنا ينصرك يا مى ربنا ينصرك

  22. >عسسسسسسسسسسسسل والله عسل عارف انا مشفتش الفيلم لاني بره مصربس كنت متاكد انه بالشكل المريع ده بس انت وصفته ايه وصف دقيييييييييييق بس من غير ذره طبعااحييك على حبك للانثى المجنونه اللتي تجري في دمائنا اسكندريه

  23. bluestone says:

    >عباس العبد:لابد وان احترم تقديرك للهيطة اليسنما المصرية الجديدة .. وطبعا لازم ولابد احترام أسباب تقديرك لها .. ولكن سيتعين عليك احترام اسباب الآخرين في اللهاث وراء السيد سماجة صاحب الشعر المسبسب والعضلات المفتولة والتسبيلة القاتلة .. —————————–اسكندراني قوي:الله يكرمك .. ويرجعك بالسلامة ولو الفيلم وصل عندكوا دي في دي اوعى تشوفه

  24. >تحديث :والعهدة على الدستور اليومي ، هتف عدد من جماهير حفلة لمنير وحسني ضد تامر حسني وطلبوا منه النزول ومن منير غناء أغنية “خلي السلاح صاحي” لرفضهم أن يغني في الحفل مطرب هارب من التجنيد!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s