دبدوب جيبونز والنبي … حينما يصبح الغباء جريمة

Posted: 30/11/2007 in Uncategorized

يبدو انه ليس مقدرا لنا أن يمر يوم ولا نصدم بحقائق ووقائع تبين مدى الغباء والهوس الذي أصاب عالمنا ..والامر لا يتوقف فقط على بلادنا
حكايتنا الليلة من السودان .. وارجو لاصحاب المرارات الضعيفة التوقف عند هذا القدر
صاحبة الصورة أعلاه هي معلمة اسمها جيليان جيبونز وهي معلمة في مدرسة بريطانية في الخرطوم وتدرس الصف الابتدائي
هذه المرأة اعتقلت واتهمت بإهانة الاسلام والنبي محمد وتواجه حكما بالجلد او السجن لمدة عام او الغرامة
وها هو رابط خبر بشأن الموضوع لتحري الدقة والحياد واحترام المصداقية
اما القصة ببساطة هي ان ماري جيبونز معلمة الصف الابتدائي في مدرسة ابتدائية في الخرطوم أرادت في أحد الايام ان تعلم تلاميذها معنى الاختيار والتصويت فطلبت منهم اختيار لعبة لتكون بمثابة تميمة الفصل الذي يدرس به 23 طفلا
وبالفعل اختار الصغار لعبة دبدوب صغير
ثم طلبت منهم اختيار اسم للعبة .. وبما ان اغلب الطلبة من المسلمين واسم محمد من اكثر الاسماء انتشارا بين المسلمين فقد اختار عشرين طفلا بين 23 طفلا اسم محمد ليطلق على اللعبة من بين اسماء اخرى كحسن وعبد الله .. ولكن الاطفال اختاروا اسم محمد ليطلقوه على اللعبة
ثم طلبت منهم المعلمة ان يأخذ كل طفل اللعبة معه إلى المنزل ثم يكتب ما يشبه اليوميات عما فعله مع لعبته
حتى الآن ويبدو أمرا طبيعيا .. معلمة بريطانية تطبق نظاما ابداعيا لتعليم الاطفال معنى الاختيار والتصويت
ولكن ما ان علم الاباء حتى جن جنونهم وابلغوا الشرطة والتي قامت بدورها بالقبض على جيبونز .. بل ان البعض عبر عن رغبته الفورية في التظاهر !!!!!!!!!!!!!!!!!!!!!!!!!!ه
ولم ينتهي الامر عند هذا الحد .. فربما ظهرت الحقيقة وفهم الجميع الموقف .. ولكن الامر انتهى بتوجيه اتهام رسمي لها “باهانة العقائد الدينية وإثارة الكراهية والإزدراء بالعقيدة”.
و تواجه جيبونز اذا أُدينت عقوبة الجلد 40 جلدة أو دفع غرامة أو السجن لمدة عام
لا أملك تعليقا
إلا انه أحيانا يصبح الغباء جريمة لا تغتفر
(تعدييييييييييييييييل
بناء على تصحيح وردنا من مجهول
تم تعديل الاسم وتصحيحه من ماري إلى جيليان
ونشكر السيد المجهول
Comments
  1. Abdou Basha says:

    هذا الخبر يصلح للقراء فئة منزوعي المرارة، وبعض الأعضاء الأخرى
    في المجتمعات المهزوزة هناك سلوك مرضي يعرف بالزنبقة، أعتقد أن المعلمة كانت ضحيته، ربما كانت موضع شك أو كراهية من البداية
    الخبر ليس غريب، وهناك أمور مثله تحدث في مصر، حالة التهاب عقلي
    أنا حزين
    😦

  2. bluestone says:

    بالظبط يا عبده باشا
    حالة التهاب عقلي حاد

    بقالي يومين في نفس حالة الحزن دي على مدى الهوس اللي اصابنا

    وقد ايه بنخسر كل يوم

  3. منار منجد says:

    أو قد يكون مرض التحفز
    أو هوس الهجوم.. والمؤامرة.. والشر الذي يملأ العالم..

    احنا دايماً خايفين ان الدنيا بتحقد علينا وتحيك لنا المؤامرات.. وهذا الدبدوب مؤامرة صهيونية دنيئة..

    الحمد لله، طلعت مرارتي مطفية من زمان

    مساء الخيرات

  4. lastknight says:

    امتنع عن التعليق ليس للمعارضه .. لكن لأنك لم توفى بوعدك

  5. محمود سعيد says:

    للأسف غبائها مش جريمة فى حد ذاته

    بس غبائهم هو اللى جريمة

    (أقصد غباء من أعتبر غبائها إهانة للنبى ، ولا أقصد أى إهانة للشعب السودانى بالمرة)

  6. SnipER says:

    Eارفض حدوث هذا بشدة
    (موسيقي صوتيه مصاحبة تتوائم مع الموقف)

    ولاتعليق
    مهو بعد اجتماع جمعية المهلبية الوطنية اياها انا معادش عندي حاجة تاني تتفقع خلاص
    اللهم لاتؤاخذنا بما فعل السفهاء منا

  7. مريم says:

    هى بس عشان خوجاية واحنا بنقلق من الخواجات وحاسين دايما انهم بكرهو النبى والاسلام
    يمكن لو كانت فكرة مدرسة مسلمة مكنش حصل كده
    هو احنا ليه بقينا كده

  8. محمد الهنداوى says:

    وتماشيا مع حرية الرأى والتعبير المقدسه
    فأنا يضايقنى أن يطلق احدهم اسم النبى الكريم على دبدوب
    ويؤذى مشاعرى
    حتى لو اتهمت بالغباء
    اعتقد كل واحد حر فى انه يحدد ايه يضايقه وايه يبسطه والموضوع مالوش علاقه بالغباء والذكاءهو ليه علاقه اكتر بالاراء المسبقه والتحفز الجاهز للظهور فى اقرب فرصه لمجرد الخلاف فى الرأى
    والسيده لم تجلد ولا شئ
    ولا احد يعرف اصل القصه وما وراء الاحداث
    وبريطانيا معترضه
    والدبلوماسيه الاميريكيه بتتدخل
    هيصه بقى
    هو احنا مش هنخلص من الحاجات دى ولا ايه

  9. Anonymous says:

    الست اسمها جيليان مش ماري يا بلوستون

  10. Mina Riad says:

    هي دتساهل الحرق علشان راحت السودان اساسا

  11. bluestone says:

    منارة:
    كيفك ؟
    هي فعلا حالة من حالات الهوس
    عايشين في مؤامرة كبيرة وفاكرين كل الناس بيتآمروا عليهم

    المرارة الله يرحمها من زمااااااااااان

  12. bluestone says:

    lastnight:
    انا لسه عند وعدي وفي انتظار بوست جديد ساخن
    ==============================

    محمود سعيد:
    انا مش بعتبر تصرفها غباء بأي حال من الاحوال
    ربما جهل بطبيعة وحساسية المجتمع اللي هي فيه ..
    لكن الغباء المطلق هو اللي رد الفعل الغاشم المتخلف تماما
    مش من كل الناس اكيد
    صحفيين كتير في السودان رفضوا التخلف ده
    والمجلس الاسلامي البريطاني قال ان ده تصرف سخيف وغير مبرر

  13. bluestone says:

    sniper:
    🙂
    واي سفهاء !!!!🙂
    -=================================

    مريم:
    هو مش بس رد فعل الناس اللي فيه مشكلة
    انما رد فعل السلطات الرسمية كمان
    الشرطة قبضت عليها
    تمهيدا لتقديمها للمحاكمة
    ==============================

  14. bluestone says:

    محمد الهنداوي:
    هو انت فاهم انها هي اللي غبية ؟!؟!؟؟؟؟؟؟؟!؟!؟!؟!
    يا نهار اسود !!!!!!!
    اتفهم تماما ان تنزعج وتغضب ان اطلق احدهم اسم النبي على دبدوب او وجه إليه اي إساءة من اي نوع
    ولكن ….
    التصرف هنا أصلا لم يكن عن قصد باي حال من احوال …

    هو انت ماقريتش القصة ولا ايه ؟؟؟؟؟
    الاطفال هم اللي اطلقوا الاسم على اللعبة لانه اكثر الاسماء انتشارا بين المسلمين وده شيء طبيعي

    يعني مطلوب شوية تمييز على خفيف من الناس اللي هناك !!!
    وشوية تحقق وفهم
    مش غشومية

    يعني ايه محدش يعرف اصل القصة .. ؟؟
    اللي روا القصة بالشكل اللي اتعرف واتنشر مكانتش هي ولا طرف بريطاني
    الشرطة السودانية هي اللي اطلقت القصة
    يعني مافيهاش لبس اظن؟؟
    وافتكر ان مسألة انها لسه ماتجلدتش مش قضية هنا
    الفكرة اصلا انها تحاكم وتعرض للجلد !!
    وناس تطلع تتظاهر بدون فهم

    الامريكان ما اتدخلوش لحد دلوقتي …
    رد فعل بريطانيا الاول كان استدعاء السفير لفهم الموضوع
    ومفيش اي تدخل لحد دلوقتي

    يا دكتور .. فيه تبرير مواقف
    وفيه دفاع لاجل الدفاع وخلاص !!!
    وافتكر ان الحقائق باينة مش محتاجة

  15. bluestone says:

    مينا رياض:
    مش كده🙂

  16. Superluli says:

    ma3lesh el computer beta3i mesh beyekteb 3arabi…
    koll elli et2al hena kalam gameel! ana mabsuta enni 2areet kalamko, da she2 yedini amal…

    ana bardo shayfa en el 3’aba2 men 3andohom mesh men 3andaha. yegra eh ya3ni lama el dabdoub yeb2a esmo mohamed? ana ommi masreya moslema kanet 3arosetha esmaha ma7moud, le2enaha kanet bet7eb el esm. we7na lama benshouf 7aga 7elwa ben2oul “allah” 7ata law mozza labsa 3eryan fel share3…

    di moshkelet el belaad elli zayena elli fiha naas fadia,,ma3andahaash sho3’la wala mash3’ala..

    i am glad i ran into this blog – good job girl🙂

  17. محمد الهنداوى says:

    يا بلو ستون
    اولا مافيش نهار باللون اللى قلتى عليه ده
    ثانيا انا بقول لو أُتُهِمتُ (أنا) بالغباء
    وحتى لو انا فهمت غلط ميبقاش يوم اسود ولا حاجه
    وانا قريت على فكره الموضوع
    محتاجين شوية هدوء احنا
    وانا قريت انك قلتى ان الاطفال اللى اختاروا الاسم وعشان كده قلتك ان الحقيقه انا معرفهاش ومش مطالب انى اصدق كل اللى اسمعه
    وبعدين احنا بنتكلم عن اطفال عمرهم 6 او 7 سنين يعنى مش طرف فى الموضوع اصلا يعنى مدرستهم مسئوله عنهم وعن توجيههم
    وبعدين احنا محتاجين كمان تعريف للحريه نتفق عليه قبل ما نتكلم
    عشان نقدر نقيس عليه فى قضيه زى دى وفى قضيه زى سمينه مالك كمان
    امتى من حق الدوله تحاكم حد على اراضيها
    وامتى يبقى غباء لما دوله تانيه تعمل نفس الشئ
    يعنى و المقياس هو رأيك الشخصى او توجهاتك الفكريه يبقى من حقك تقولى اى حاجه وانا مقدرش اعترض
    وختاما ربنا ياخد المدرسه البريطانيه والحكومه السودانيه فى يوم واحد
    ويكون ابيض

  18. محمد الهنداوى says:

    نسيت بس اقول ان نقطة الحقايق باينه دى فها شك كبير بالنسبه لى
    مش بشكك فى كلامك لا سمح الله بس لانه الاعلام المحايد لم يوجد بعد
    والدفاع لاجل الدفاع حق برضه من حقوق الانسان
    سلام عليكم

  19. abnhamedo says:

    elly 7sal dah msh 3shan ehant el isalm wla 7aga …. dah noo3 mn el kbt tl3 m3a awl 7aga 2bloha.

  20. أحمد المصري says:

    أنا سمعت عن الخبر بس معرفش إن تفاصيله كده..مادام كده يبقى مش غباء..لإن الغباء يتطلب وجود مخ..هنا مفيش مخ خالص0

  21. بنت القمر says:

    http://livedcrossroads.blogspot.com/2007/12/blog-post.html
    هاي بلو اقري البوست دا
    اولا تانيا بعد اخر بوستين عندك بتاع سمينه وانا قلت رأي عند حفصه فيه وهذا البوست احب اهديكي وجهه نظر اخري كتبها عدي النهار واحب اهديكي اخر بوست عندي للفرجه مش لازم تعلقي بس عشان تعرفي الهوس والغباء جايين منين وليه تحياتي

  22. محمد says:

    أزيك يا بلو
    مش عارف بس دايما بجد عندك شحنة قوية من المثيرات الفكرية
    بصي بقى الست دي مش غلطانة
    ولا غبية وفكري بمنطقية
    الست ولا عملت حاجة غلط
    مش علشان سيدنا الرسول (ص) أسمه محمد عليه الصلاة والسلام
    يبقى كل اللي يجيب سيرة الإسم ده يبقى زنديق وبيحتقر الأديان ويستاهل الحرق
    بصي يا بلو
    أنا كل يوم باتأكد أكتر إن أحنا إرهابيين زي ما بيقولوا علينا الغرب
    طب عارفة إن إيران عملت زي ما عملت الدينمارك وحكاية رسوم كاريكاتورية برده على الهولوكست
    وماذا كان رد فعل الشارع الغربي أو اليهودي …لا تعليق
    أما أحنا أما حد يتكلم علينا
    نضرب نار ونفجر ونقتل يجي 29 واحد علشان قالوا إن سيدنا محمد إرهابي
    طبعا هما غالطانين وغلطوا في سيدنا محمد لكن هل الرد اللي أحنا ردنا جابلنا حقنا
    لأ
    بنقولهم آه أحنا إرهابيين
    طب منوصلهم فكرنا زي ما بيوصلولنا فكرهم
    بهدوء وبدون عنف
    وجايين بعد كده نمسك واحدة
    وأظن بل متأكد إن ليس لها ميول دينية ولا تعرف حتى سيدنا محمد أو تكلمت عليه ذات مرة
    عارفة ليه لسبب واضح لو هي كانت عايزة تعمل بلبلة أو تشتم وتحتقر
    كان ممكن بكل سهولة تعمل ده في أي مدرسة ببريطانية
    أو تكتبه في صحيفة
    وهناك لا حد هيعرف يا خد منها لا حق ولا باطل
    بس ده استهبال ديني وأخلاقي عربي من مسلمين ليسوا بالمسلمين
    وهما كده اللي بيوصفونا بالإرهابيين
    وياريت الست قالت رأيها ولا نيلة يتللكولها عليها
    والله أنا لو مكان بريطانية أعمل في السودان دول عمايل
    بس برده هرجع وأقولك إنهم بلد ديموقراطي لا إرهابي
    ومينفعش يعملوا حاجة تخل بوضعهم
    عذرا للإطالة بس كنت بنفس عن نفسي شوية
    تحياتي

  23. محمد says:

    عارفة أنا نسيت حاجة صغننة عايز أوضحها
    هما هيحقدوا علينا بأمارة أيه ولا علي أيه أساسا
    من تقدمنا المذهل
    وإمكانياتنا الجامدة
    تحياتي

  24. بنت القمر says:

    سؤال تاني طرقع في بالي لو مدرس مسلم بيشتغل في بريطانيا عمل نفس الموقف وسمي اللعبه جيسوس الاهالي هيكون شعورهم ايه مش بتكلم علي محكمه وجلد وكده بس ها يقولوا مش عارف ولا غبي ولا ساذج ولا خبيث ولا ارهابي؟؟؟؟
    ؟؟؟؟؟
    ؟؟؟؟؟ اوها ياخدوا الحكايه بروح نفسيه مرتاحه ولاحظي وجود فارق ثقافي وحضاري هائل بين السودان وبريطانيا
    تحياتي

  25. Sara Swidan says:

    أول مرة أشوف البلوج بتاعك ..

    حلو والله اسم القهوة العالية .

    اتفضل : كن ضيفي..

    أنا بحزن من كتر البلبلة دي عن اساءة الرسول ..

    اللي بيتفرج منكوا على كرتون أطفال أمريكي إسمه :
    south Park
    حيشوف و يسمع أد إيه بيسيئوا للمسيح سيدنا عيسى..

    اشمعنا يعني مافيش حمال رسالة هناك ..

    هو كل المتعصبين مسلمين مثلاً ؟؟

  26. شـــــهــــروزة says:

    اللهم أكفنــى شر الأغبياء والمستغبيين

    أما الأذكياء والمفكرين… فأنا كفيل بهم

  27. bluestone says:

    سوبر لولي:
    انا حابة انقل كلامك بالعربي للي مش عارف يفهم الكلام بالحروف اللاتيني

    سوبرلولي بتقول:
    ان مامتها مصرية مسلمة والعروسة بتاعتها كانت اسمها محمود لانها كانت بتحب الاسم جدا . واحنا لما بنشوف حاجة حلوة بنقول الله .. حتى لو مزة لابسة عريان
    دي مشكلة البلاد اللي زينا اللي فيها الناس فاضية
    ..
    معندهاش شغلة ولا مشغلة

    اشكرك يا سوبرلولي
    لا فض فوكي يا شيخة
    حتى لو بالحروف اللاتيني

  28. bluestone says:

    محمد الهنداوي:
    لا يا دكتور فيه ايام بكل الالوان
    بحسب نسبة البلاوي اللي بتحصل في كل يوم
    صحيح انت مكنتش في المدرسة ومحضرتش لكن افتكر اني قلت ان المصادر اللي ذكرت الكلام ده كانت مصادر سودانية
    يعني اكيد هم مش عايزين يطلعوا نفسهم ظالمين المدرسة ولا بيفتروا عليها
    وكان سهل يألفوا اي حاجة
    لكن دي رواية الجهةا لسودانية اللي هي المفروض متحيزة للجانب السوداني

    فما بالك بالحقيقة المحايدة ؟؟؟

    الحرية مالهاش علاقة باي حاجة هنا
    هي الست طلبت منهم طلب واحترمت اختيارهم لانها اصلا بتعلمهم يعني ايه اختيار

    الموضوع مالوش علاقة اطلاقا بسيادة اي دولة ولا اي دولة من حقها تعمل مش عارفة ايه على ارضها .. ليه خلط الاوراق دي يا دكتور ؟؟؟

    وبعدين الاشارة لان الاحكام التي قداصدرها ستكون متحيزة بحكم خلفيتي ال مش عارف ايه .. مش عاجباني

    لا ربنا ليه ياخدهم .. لازم ندعي ربنا يعطي السودانيين شوية عقل
    ويدي المدرسة نجاة سريعة
    ويدينا شوية صبر

    هكرر تاني بمناسبة المشاركة التانية
    القصة كما ذكرت من جانب الحكومة السودانية مش البريطانية
    اي شك هنا هيكون في مصلحة المدرسة بما ان الحكومة بتتجنى عليها ..

  29. bluestone says:

    ابن حميدو:
    كلامك وجهة نظر لازم تحترم فعلا
    ================
    أحمد المصري:
    اللينكات الموجودة في الخبر بتوضح المصادر اللي انا جبته منها للتحقق منه…
    وفعلا الشك في وجود المخ السوداني بنسبة كبيرة

  30. محمد الهنداوى says:

    يا ماريان
    انا قلت بوضوح انى لا اشكك فى كلامك ولكنى اعتقد ان الحياد غير موجود فى هذا العالم
    وعارف ان الروايه نقلت عن لسان الحكومه السودانيه ولكن من نقلها هى وسائل الاعلام فانا لم استمع بنفسى الى اى مسئول حكومى يتحدث عن الموضوع
    وانا لا المح لشئ تتضايقين منه انا قلت بوضوح ان رأيك فى البوست ده واللى قبله انا شايفهم ضد بعض
    وسألت عن معيارك للحكم على الامور هل هو معيار ثابت ام حسب رأيك فى كل موضوع على حده
    وقلت لو كان حسب رأيك يبقى اسمع واسكت واحترم رأيك انما لو معيار ثابت ممكن نتفق عليه يبقى انا شايف انك بتناقضى نفسك
    بخصوص بقى التلميح اللى مش عاجبك فهو مش تلميح الصراحه
    انما هو تصريح بانك منحازه
    واحيانا لحد التعصب
    وانا كمان منحاز بالتأكيد لما أومن به
    والانسان الحيادى غير موجود او فى احسن الاحوال هو موجود ولكن بلا عقل ولا موقف اساسا
    ازاى ابقى حيادى اصلا اذا كانت الدنيا كلها بكل مجالاتها حاجات ذد بعضها
    مانا لازم واكيد منحاز لموقف ما
    معرفش ليه معتبرينها احنا مشكله اننا نعترف بده؟
    انتى بتاخدى الكلام بحساسيه والدليل اخر مره اتكلمنا
    فاكره؟
    لما ما سمعتيش كلامى
    عشان كده قلتلك محتاجين نهدا شويه
    تصبحى على خير

  31. bluestone says:

    بنت القمر:
    آسفة جدا على التأخير بس الشغل في احسن حالاته اليومين دول..
    انا قريت البوست فعلا .. واتفق مع كاتبه على ان الموضوع كان ممكن ينتتهي بسهولة في إدارة المدرسة والتنبيه على المدرسة ان محاولاتها لتعليم الاطفال قد تؤدي لاثارة استياء بعض الاهالي …
    لكن لا اتفق معاه ابدا في ان السبب هو استعلاء الغرب ولا هوان المسلمين ولا مش عارف ايه ..
    لسبب بسيط جدا اللي صعد هو الحكومة السودانية .. الحكومة البريطانية لم تتدخل إلا بعد كام يوم
    هي فعلا اعتذرت وقالت انها مكانتش تعرف .. وحكومتها لم تتدخل إلا بعد إدانتها بالفعل من قبل القضاء السوداني وافتكر فعلا ان التدخل كان في وقته ومكانه لان الكلام كان سخيف جدا وبدأ يبقى هلاوس وهوس فعلا

    انا شفت البوست بتاعك اللي قولتيلي عليه
    بس مافهمتش ايه العلاقة بين الحرم الابراهيمي والقضية الفلسطينية وبين قضية المدرسة البريطانية في الخرطوم
    معلش يا بنتي انا كتر الشغل خلا الرامات عندي ضربت🙂

  32. HafSSa says:

    مش عارفة اعلق بايه
    بس هما دول بالظبط اللي جم في الهايفة و اتشطروا
    و ياريتهم فعلا اتشطروا
    جتهم خيبة
    سابوا كل البلاوي اللي عندهم و جم يمسكوا في المدرسة الغلبانة دي
    يعني ميستغربوش بعد كده لما ميلاقوش اي حد عليه القيمة يرضى يجيلهم و يعلمهم على احدث مستويات نظريات التعليم
    و الغريب ان الاولاد هما اللي اختاروا الاسم مش هي يعني
    و هي قبلت باختيارهم و سواء عن علم مين اسم محمد ده او مش عن علم بس هي سابتهم يختاروا
    ممممممممممم
    الهي الوطن الاسلامي و العربي يختفوا من على وش الخريطة و نستريح كلنا و نريح العالم من قرفنا
    دي بقت حاجة تفقع المرار و مع اني شايلاها بس انفقعت برضو
    نرفزتيني يا بلو
    سلام

  33. bluestone says:

    أحمد:
    الله يكرمك ..دي إشادة اعتز بيها فعلا

    لو فهمت ان رأيي انها هي اللي غبية يبقى ركز تاني .. الغباء هنا عائد على السودانيين مش المدرسة

    مقدرش اعلق واقول اي حاجة بعد اللي انت قلته ابدا .. الله ينور عليك

  34. bluestone says:

    بنت القمر:
    بالنسبة للسؤال اللي طرقع في دماغك .. لو مدرس مسلم عمل نفس الموقف .. كنتي هتلاقي برضه شوية ناس اتضايقوا من الأسر .. وراحوا اشتكوا للمدرسة .. وخلص الموضوع على كده

    لا كانوا هيقفلوا المدرسة ولا هيطالبوا بجلد المدرسة بالكرباج …
    ولا كانت الشرطة البريطانية هتروح تقبض على المدرس وتحاكمه كمان ..

    حرام عليكي تظلمي السودانيين في مقارنة غير عادلة زي دي

    انا ممكن افهم انزعاج الاسر مثلا لكن انهم يتظاهروا ؟؟؟؟ ويقفلوا المدرسة

    وموقف الحكومة.. ايه التخلف ده ؟؟

  35. bluestone says:

    محمد الهندواي:
    معايير الحكم لما تختلف يبقى مش بس تحيز تبقى ازدواجية فكرية ..

    والحقيقة انا مش شايفة ابدا اي تناقض .. وما شفتش الا انفعالك في اطلاق الاحكام .. لكن مش مشكلة ياريت توريني انا فين ناقضت نفسي بين البوستين عشان نبقى فاهمين احنا بنتكلم على ايه .

    اما اذا كنا هنوقف الكلام على اني مصابة بازدواج فكري وتحيز في الحكم على الامور

    fine
    اذا كان ده رأيك
    احيانا بنقرا ونحن نملك أراء مسبقة .. ودي بتعمل مشكلة في الاستيعاب .. وتلبس الكلام ما ليس فيه

    يالا ما علينا

  36. bluestone says:

    سارة سويدان ..
    اهلا بيكي ومنورة ..
    انتي سألتي سؤال حلو قوي .. وبصراحة مش عارفة الاجابة .. عليه .. ليه مفيش ناس بتعترض على الاساءة للسيد المسيح في الاعلام الغربي .؟؟؟
    انا اصلا بكره مسلسل ساوث بارك جدا
    وبعترض انه يكون موجه للاطفال من اساسه .. بس على العموم انا مش من المتابعين ليه باي حال

    بالنسبة للسؤال التاني . هل كل المتعصبين مسلمين ؟؟
    اكيد لأ .. التعميم مش علمي ولا منطقي اصلا
    بس الموضوع فعلا محتاج نقاش طوييييييييل قوي
    ربما نستكمله قريبا
    تحياتي

  37. بنت القمر says:

    هاي بلو
    انتي لسه فاكره دا انا كنت نسيت
    المهم سعيده بمرورك برضه
    انا اللي قلتلك لاحظي الفرق الهائل بين بريطانيا والسودان تقومي تقوليلي
    حرام عليا اقارن ده بده
    طب ما انا عارفه انه مفيش مقارنه بس كنت عاوزة اعرف البريطاني العادي جدا المسيحي مش ها يحس بضيق وغضب انه يلاقي مسلم مسمي الدميه جيسوس
    مش ها يقول عليه ابدا مش عارف ثقافه البلد ها يقول بيسخر من مقدس مسيحي سواء بقا كان رب او ابن رب
    مفيش حد في البشريه ابدا مش عارف قدسيه كلمه المسيح ولا كمان في الجهه المقابله عارف ان محمد اسم رسول مليار بني ادم
    المهم انتي قلتي ها يدايقوا ماشي وانا كمان متفقه والسودانيين كمان اضايقوا
    انتي بتقولي الحكومه السودانييه
    ماشي يا قلبي ومين قالك ان حكومه السودان من دارسي علم مقارنه الاديان ولا من دارسي الادب الفرنسي او الكيمياء الحيويه ما هم بني ادمين نتاج مجتمعهم
    واذا كان مجتمعهم متشنج متعصب يبقا هما زيه بس تختلف طبيعه رد الفعل من حته لحته
    علاقه بوست فلسطين بتاعي
    فتشي عن الاحتلال يا عزيزتي
    ما تقوليليش بقا والغرب المستعلي دا ملوش دعوة واللاحتلال نناقشه بعدين
    كله في سله واحده يا حبي
    لاتستطيعي الفصل واذا النخبه وحضرتك تستطيعي الفصل المليار الاخرين مش ها يقدروا
    هما مترسخ في عقولهم الواعيه والغير واعيه ومترسخ في خلايا اجسامهم ان بريطانيا احتلت بلادهم و كما اهدت فلسطين لليهود وبعدين تيجي مسز جليلن تسخر كمان من رسولهم يبقا قولي عليها يا رحمان يا رحيم ولازم يقطعوها حتت واللي مقدرش علي الحمار يتشطر علي ماري
    وعموما محاكمتها وقفت والقضيه خلصت والحكومه بتاعتها وراها
    فهمتي اقصد ايه يا سكر
    والله سكر
    باااي

  38. عدى النهار says:

    سؤ تقدير المدرسة الذى أشرت إليه فى البوست عندى كان فى عدم إدراك المدرسة لقيمة الإسم الذى سمحت للأطفال بإطلاقه على الدمية وليس فى أن محاولاتها لتعليم الاطفال قد تؤدي لاثارة استياء بعض الاهالي كما جاء فى تعقيبك هنا. ثم لا تنسى أن الأهالى الذين أرسلوا أطفالهم لهذه المَدرسة كان همهم الأكبر هو توفير تعليم أفضل لأطفالهم لكن هذا لايعنى أن كل شىء مقبول عندهم لتحقيق هذا الغرض

    لو نظرنا للأمر من زاوية أخرى لا أعتقد أن طفل قد يطلق إسم أحد والديه على دميته التى يحبها رغم أنه لا يوجد أقرب وأحب لطفل من والديه ، السبب لذلك فى رأي هو قيمة ومعنى الوالدين عند الطفل. طبعاً لا أتوقع من مدرسة من بيئة وثقافة مختلفتين وقيم مختلفة أن تدرك قيمة الأنبياء فى مجتمعات الدين فيها له مكانة كبيرة وبالتالى لا أنتظر منها سلوك مختلف عما حدث

    بالنسبة لإستعلاء الغرب.. أنا لا قلت “هوان المسلمين ولا مش عارف إيه..” ولا أرى أن تدخل الحكومة البريطانية له أى سبب دينى. بلادنا بمسلميها ومسيحييها وكل طوائفها هينة فى عيون الغرب وكل من له سطوة وإلا ما كان حدث تدخل سافر فى كل صغيرة وكبيرة من كل هب ودب وموقف الحكومة البريطانية من حكم القضاء السودانى ليس أكثر من مثال واحد خاصة أن المدرسة كانت تقضى فترة الحكم والتى تبقى منها 6 أيام فى مكان مناسب وليس سجن وكما ذكرت هى بعد خروجها كانت تعامل معاملة جيدة

  39. ادم المصري says:

    رحم الله امرا قال ذات يوم
    .
    .
    مازال امامنا مائة عام كي نصبح بهائم
    .
    .
    .
    .
    تحياتي والسلام

  40. bluestone says:

    انا مقلتش ان المدرسة البريطانية كانت جاهلة بثقافة اهل السودان
    انا قلت انها لم تتخيل ابدا ان اللي عملته يعتبر إساءة
    ناس كتير من اللي ردوا على التدوينة وهم مصريين مسلمين كانوا بيسموا العرائس اللعب في طفولتهم بأسماء شخصيات دينية أو انبياء لاعتزازهم بالشخصيات دي
    ومفيش اساءة في المسألة

    يعني المجتمع السوداني كله يا بنت القمر واللي افرز الحكومة السودانية مفيهوش واحد مسلم معتدل عاقل؟؟؟
    يعني ايه نتاج مجتمعهم.؟؟ يعني مجتمعهم كله شوربا ؟؟؟

    ماشي يا عسل
    نتقابل بقى في البوست اللي جاي
    لانه هيكون تابع سلسلة جرائم الغباء
    بس المرة دي لوكال
    محلي يعني

  41. bluestone says:

    آدم المصري:
    أوجزت بأفبلغت

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s