تناتيش

Posted: 08/10/2008 in Uncategorized

تنتوشة أولى:

حصيلة حفل زفاف حضرته قبل ايام
4235 مبروك
3200 ألف مبروك وألف ألف مبروك
2500 عقبالك بمتنوعاتها (عقبالك، ان شاء الله نفرح بيكي، الدور عليكي بقى)ا
1300 عقبال فرحك

متنوعات بعضها جاء جديدا تماما:ا

شدي حيلك
انتي عندية ليه كده
مش نفسك تعملي زيها؟ (تقصد العروسةا
انتي في دماغك ايه يا بنتي؟
هم الرجالة عميوا؟ا
انتي مش عايزة تفرحي اهلك بقى ولا ايه؟ا
انتي خلاص مضربة عن الجواز؟ا
انتي مستنية ايه بس؟ا
انتي مش غيرانة؟ ماتغيري منها وتعملي زيها بقى
اقرصي العروسة في ركبتها بقى
انتي تعبتينا خالص
والرد على كل التعليقات المذكورة عاليه .. ابتسامة خفيفة .. وشتيمة يعاقب عليها القانون (في سري طبعا)ا
===================================================================

تنتوشة تانية:ا

في خبر ذكرته احدى الصحف وبعض المواقع الاخبارية عن انهيار عمارة في اسكندرية جاء ما نصه:ا

وقال الدكتور محمد سلطان إن الدكتور حاتم الجبلي وزير الصحة والسكان أمر عقب علمه بالحادث بإرسال فريق طبي إلى موقع الحادث يضم نخبة من اخصائى الجراحة والتخدير والعظام والمخ والأعصاب وإرسال عدد من سيارات الإسعاف – حسبما ذكرت وكالة أنباء الشرق الأوسط .

وسؤالي للسيد الدكتور محمد سلطان .. وللسيد الدكتور حاتم الجبلي ايضا
يعني هو لو وزير الصحة ما أمرش .. مفيش فرق طبية هتتوجه لمكان الحادث؟؟؟؟؟؟؟؟ا
يعني مثلا لو كان السيد الجبلي مش فاضي، نايم، او لومؤاخذة في الحمام مثلا .. مفيش ولا سيارة اسعاف ولا دكتور هيتحرك إلا لما السيد
الوزير يأمر بارسال فرق طبية لمكان الحادث؟؟؟ا
برضه يحضرني هنا لفظ قبيح سيعاقب عليه القانون في حالة توجيهه لمستحقيه
====================================================================

تنتوشة تالتة:

سفري لاوروبا وعودتي جعلوني اتعامل مع وجه جديد لمصر مختلف تماما:ا

مطار القاهرة:ا

والذي اسمته العزيزة حفصة مطار الدويقة الدولي. اقروا عن رأي الناس فيه هنا وهنا

في طريق عودتي مررت بمطارات اوروبية وهي كوبنهاجن وفرانكفورت .. ولذلك اي من القراء الاعزاء سيدرك هول الصدمة الارتطام بمطار القاهرة

فلا حاجة لسرد وقائع تصب كلها في توضيح مدى دقة ونظافة وجمال وفخامة مطار كوبنهاجن مثلا.. بل ان محطة القطارات تبدو اجمل من مطارات كثيرة. محطة القطارات الملحقة بالمطار .. فيمكنك بسهولة جر حقائبك واستخدام الانفاق للوصول لمحطة القطارات ومنها لاي مكان في المدينة …. بسهولة غير معقولة

صورة لمحطة قطارات فرانكفورت

ولا مدى نظام وجودة الخدمة وروعة التسوق في مطار فرانكفورت
تسوق في كوبنهاجن .. تدلع في كوبنهاجن

وكيف انك يا عزيزي المسافر تحصل على كل الخدمات الفاخرة والنصائح العديدة واحيانا خدمات بلا مقابل لمجرد راحة سيادتك
ليس لانك وزير ولا سفير
ولكن لانك مسافر تكتشف ان الجميع في هذه المطارات يشكرك على اختيارك طيارانهم

او عندما تجد نوعين من المقاعد في مطار كوبنهاجن .. النوع الاول مقاعد مريحة وامامها طاولات في مكان به اضاءة جيدة ويمكنك مشاهدة حركة المارة والمتاجر في المطار
او مكان آخر بإضاءة اقل تحيطه فواصل عريضة والمقاعد داخله اكبر حجما واكثر ميلا .. وهي مخصصة للركاب الراغبين في النوم قليلا حتى موعد طائراتهم!!!!!!!!!!ا

فعندما تقترب من امرأة جميلة على وجهها ابتسامة رقيقة تسألك ان كانت تستطيع ان تخدمك بأي شيء
وتبدأ انت عزيزي المسافر في سرد مشكلتك او طلباتك التي تصبح عندهم أوامر
مطار كوبنهاجن في الاحوال العادية

او عندما يستوقفك رجل الامن في مطار اوروبي والذي لا يرتدي زي الشرطة ولكن زي خاص للمطار لانك وضعت زجاجة مشروب اشتريته من السوق المحلية في حقيبة يدك فيطلب إليك بابتسامة عريضة ان تقف خارج الطابور وحينما يلاحظ توترك يبتسم اكثر ويبدأ في المزاح معك لتخفيف توترك ويشرح لك الموقف ببساطة وافضل الحلول المناسبة لك ليخرج الجميع سعداء وتحصل انت على خدمة شحن خاص لاشياء قابلة للكسر بلا مقابل لانك لم تكن تعرف وارادوا هم خدمتك

وفي كوبنهاجن ايضا يمكنك الانطلاق من المطار إلى محطة القطارات .. والتي لن احدثكم عنها حفاظا عليكم من مختلف الامراض التي تبدأ بالضغط والسكر .. فلن اقول لكم مثلا ان القطار في كوبنهاجن من درجتين الدرجة الاولى لا تفرق عن الثانية في اي شيء سوى في الصمت .. فعربة الدرجة الاولى مغلقة بأبواب مانعة للصوت حتى ينعم راكبها بالراحة.. فلا يمكنك التحدث او حتى الهمس داخلها. وبداخل القطار يوجد ايضا مكان لتضع دراجتك وحقائب بلاستيكية صغيرة لتضع مخلفاتك
وطاولة لطيفةامام كل مقعد !!!ا

لا حاجة بالتأكيد للحديث عن كل ذلك

وربما ايضا لا حاجة للحديث عن مطار القاهرة الذي يبدو بجوار تلك المطارات كسوق شعبي او موقف ميكروباصات في مدينة السلام

فأول ما يقابلك في مطار القاهرة هو لخبطة المواعيد.. فتنتظر داخل الطائرة اكثر من 45 دقيقة في انتظار مكان فاضي الطيار يركن فيه!!!ا

ولك ان تتخيل كمصري تجلس في طيارة تابعة لشركة طيران المانية والطيار الالماني يخبرك وفي صوته نبرة سخرية حادة انه مضطر للانتظار لان المطار مكتظ ولا يوجد مكان لانتظار الطائرة

ثم تستقبلك الطوابير المتواصلة .. في مكان سخيف جدرانه من السيراميك الابيض فتشعر انك في حمام كبير
وتساعدك الرائحة على تعميق ذلك الاحساس
ثم تقف في طابور طويييييييييل ينتهي بأكشاك زجاجية يجلس في كل منها 3 رجال شرطة .. يرتدون الزي الرسمي وتلمع اكتافهم بما جاد به وزير الداخلية من رتب. يقف امامهم المسافر ايا كانت جنسيته ذليلا مكسورا.. ينظر إليه السيد الضابط بارتياب لا ينتهي ولا يتغير من مسافر لاخر .. يفحص الاوراق.. وان كنت سعيد الحظ عبرت

أما ان كان حظك مثل اكثر من 30 راكبا على طائرة واحدة ومن جنسية واحدة فمصيرك مكتب في حمام اصغر .. اقصد في غرفة اصغر على جانب القاعة

مطار القاهرة يستقبلك بالفوضى ثم القذارة ثم القبح ثم الهيئة الامنية
وهو ايضا يودعك بالكثير والكثير من الفوضى والقمامة والعبث والتهريج وغياب مطلق للنظام ..
فيرسل رسالة واضحة باسم الشعب القاطن تلك البلد
ان كنت ذاهبا .. لا تعد ابدا يا حمار
وان كنت عائدا .. يا ويلك يا سواد ليلك يا حمار برضه
Comments
  1. ^ H@fSS@^ says:

    كويس يعني انا مش قلة الحمدلله
    لان جات لي تعليقات قالو لي انها حالات فردية
    فجت ف يمخيليت الفاظ من اللي بيعاقب عليها القانون دي ان اعمري ما شفت مطار بيمشي بالتساهيل الا مطا الدويقة
    و طيران الدويقة
    بس سيبك
    ضحكتيني موت في اخر فقرة

    وهو ايضا يودعك بالكثير والكثير من الفوضى والقمامة والعبث والتهريج وغياب مطلق للنظام ..
    فيرسل رسالة واضحة باسم الشعب القاطن تلك البلد ان كنت ذاهبا .. لا تعد ابدا يا حماروان كنت عائدا .. يا ويلك يا سواد ليلك يا حمار برضه

    تقريبا نفس المعنى اللي حسيته و انا واقفة ف يالطابور

    لنما الله يا اختي
    او نهاجر برا و منرجعش

  2. Moon-baby says:

    ازاي متغيريش منها؟ لازم تدخلي السباق و تكعبليليك واحد كدة و تتصارعي كي تفوزي بغنيمة(عريس) يضرب عريسها بالجزمة..عريس كدة Full option.. و متنسيش تتنحنحي و تتسهوكي علشان يستوي و يخش القفص قال ايه بمزاجه :))

    و كلمة “تفرحي اهلك” دي اغلس حاجة ممكن تتقال…بتحسس البنت بالذنب..ذنب لم تفترفه اصلا..باحس انها ابتزاز عاطفي (دنيء).

    اما عن المطارات فأنا مليش خبرة…بس وصفك و وضع المتنافرات جنب بعض اصابني بشبه صدمة.

  3. ~*§¦§ Appy §¦§*~ says:

    يا دى الطيران تصدقى انا فرحانه فيكى انتى وحفصه بجد
    اماالفرح فيا طوله بالك يا ااا بجد وعديتى كل ده ههههههههههه

  4. ^ H@fSS@^ says:

    طيب يا ابي يا حبيبتي اكتبي انتي كمان تجربتك عشان نكون تلاتة في واحد
    ههههههههههههههه

  5. bluestone says:

    حفصة: لا طبعا ازاي انتي لوحدك
    المطار بيشهد لنفسه يا امي

    صدقيني دي حاجة موجعة جدا
    لان المطار بالذات هو أول وآخر ما يراه اي ضيف لاي بلد
    فلما نبقى بنعمل كل الهوليلة عشان السياحة وبعدين اخر حاجة الضيف يشوفها تبقى المطار
    يبقى ماعملناش حاجة

    قريتي الكلام اللي الناس قايلينه في اللينكان على المطار ؟؟

    حاجة تحزن

  6. bluestone says:

    مون بيبي:
    هو الفول اوبشن ده بقى من ضروريات الحياة باين
    بس بيني وبينك انا دلوقتي مركزة على عربية فول اوبشن اهم

    🙂

    لازم تقري الكلام اللي متقال في اللينكات عشان تتصدمي بجد

  7. bluestone says:

    آبي:
    فرحانة فينا ؟؟😦

    طيب انا كنت احصف من حفصة ولم اقم باختيار مصر للطيران ابدا ابدا

    واضح ان عندك ذكريات أليمة ..🙂

    الفرح لابد منه هنعمل ايه ؟

  8. يا مراكبي says:

    ولو إني مش عارف اللفظ الل بيعاقب عليه القانون ده أنهي واحد فيهم بالظبط لكنه يصلح لآخر تنتوشة أكتر طبعا

    مطار القاهرة هو أول مكان الواحد بتقع عينه عليه أول ما بيوصل لمصر .. وكل حاجة فيه من وقت الخروج من الطيارة لحد الخروج من المطار أقل ما يقال عنها صفيحة زبالة .. وأي حد ليه رأي غير كده ييجي معايا وأنا أوريه قطعة قطعة في المطار .. أنا حافظ المطار بتاعنا صم

    المأساة هي إني كتير بأجيب معايا ضيوف من برة مصر وبأبقى في نص هدومي من الكسوف .. وأحيانا في ربع هدومي كمان

  9. لاعب النرد says:

    هي الانطباعات الاولى من المكان التي تبرز الفرق

    عند وصولي الى مطار فرانكفورت لاول مرة راعني مشهد الطابق العلوي المخصص لمحطة القطار وكيف انك تستطيع ان تستقل درجا كهربائيا ومن ثم تقطع تذكرة وتسافر الى جهتك في غضون دقائق دون وساطة التاكسي وبعض السائقين المتذاكين .مطار ومحطة قطار معا. مطار فرانكفورت هو الاكبر في اوروبا على ما اظن وهو الاكثر راحة بالتاكيد

    تختلف الاجواء ما بين المطارات في اوروبا ويختلف مستوى الخدمة فيها (مثلا مطار برشلونة اقل من المستوى المتوقع …لكن المدينة تعوضك اضعاف الاضعاف) لكن جميعها يحاول اعطائك انطباعا انه يمكن ان تتمتع في المطار ريثما يحين موعد الاقلاع وان الانتظار هو جزء من الرحلة

  10. Hamed Ibrahim says:

    بخصوص أول فقرة
    فعلا شيء ممل جدا
    وده اللي خلاني ما بقتش أحضر أفراح
    جو من القرف والمجاملات والتصنع
    وناس رايحة علشان تتجوز
    ده غير طبعا كم الأغاني العبيطة اللي الواحد بيضطر يسمعها

    وبشكل عام سواء أفراح أو في الحياة العادية
    كل شوية حد يقولك مش هاتتجوز بقى؟
    وانتوا مالكم يا جماعة؟
    هو الموضوع بالبساطة دي؟
    أي واحدة في الشارع أو أي بنت الواحد يتكل على الله علشان يرضي سيادتهم

    حاجة تقرف

  11. SnipER says:

    انا بكره حضور الافراح في القاعات
    فظيييييييييييييييعة
    والمصريين في الافراح افظظظظظظظظظظع
    بالنسبه لمطار القاهرة بقي فانا عيني دمعت من الضحك علي الكومينت ده
    “Cairo airport is literally the ninth circle of hell.” (CL Beaty)
    وده كمان مجرم جدا
    “Before 2002 Cairo International firmly resided between the shitty cheeks of Satan’s ass.” (Neil Ross)
    ربنا يتوب علينا يارب

  12. ^ H@fSS@^ says:

    سنايبر
    و ايشمعنى قبل 2002
    ما هي طول عمرها متعودة دايما
    انا مش فاكرة اي زكرى حلوة مع مطار القاهرة بنوعيه
    الا اللهم يعني الجديد اللي اتطور ده بس عشان تروحه لازم تركب مصر الطيران و ما ادراك مصر للطيران
    يا لاااااااااااااااااهوي

  13. The Innocent says:

    مهو اللي داخلها مفقود والخارج منها مولود
    قالوا عنها انها مقبرة الغزاة، فقلت وشعبها ايضا

    تحياتي

  14. أُكتب بالرصاص says:

    والله قلبتي عليا المواجع
    مطار القاهرة لم ارى اسوء من سيدي إلا ستي

    امال مطار اسكندرية يتقال عليه ايه

    موقف مكريوباصات

    كله كوم والمعاملة من رجال الجوازات كوم

  15. micheal says:

    عاااااااادي..كله لازم يكوزن بناء علي توجيهات السيد الرئيس وحرمه وبناء علي تعليمات السيد الوزير وسيادة اللواء…وصلة النفاق والتملق المتكررة التي لا يملون منها هؤلاء القوم
    وعشان كده ده الفرق بينا وبين كوبنهاجن في كل حاجة مش في المطار بس
    أسلوبك في السرد والوصف عاجبني أوي
    تحياتي

  16. ~*§¦§ Appy §¦§*~ says:

    هههههههه اه فرحانه فيكوا وفى نفسي علشان طلعت على مصر للطيران فى رحله المغرب وندمت عارفه ايه احلى حاجه فى مصر للطيران الطيار بجد بيشهد له انه احسن واحد فى العالم مش عارفه ليه بس هو كده بجد ههههههههههه
    بس كله الا مخيفات مصر للطيران عارفاهم هههههههههههه هبقى احكي علشان حفصه تتهد هههههههههه

  17. رشا عبد الرازق says:

    نفسي أشرب معاكي فنجان قهوة
    صدقيني رجاءا
    اشتقت لكِ !

    بمناسبة التنتوشه الأولى هسمعك آخر بقا الجديد في آخر فرح عائلي حضرته
    عشان تضيفيها لقاموسنا المتنقي

    ( يا عيني ….! )
    دي رنت في ودني من واحده فاكراني مش سامعاها

    و

    متزعليش ….. نصيبك قاعد !

    شككتني في نفسي وكان فاضل ثواني وأروح أراجع وشي قدام أي مرايه واتاكد اني مكنتش بتشحتف وانا ببوس العروسه
    قبل ما أكسرها على راس المتصعبه

    المصيبه ان التعليقات دي بتتقال بون حوار

    يعني بدون سبب يجيبها في نص الجملة
    كانك بالضبط حطيتي نقطة في أول السطر
    وكان الموضوع مش اكتر من فرصه سانحه جت لواحده عشان تقولك كلمة محشورة في مكان كاروهات جواها

    سيبك انتي
    مطار عقلك أحلى
    دون أي مقارنة مع مطارات أفكارهم
    او مطار القاهرة بحال

    🙂

  18. bluestone says:

    يامراكبي:
    هو فيه ألفاظ كتير طبعا يعاقب عليها القانون وتدخل في نطاق السب والقذف

    انا اتعلمت اقول لاي حد هو كده النظام وان كان عاجبني .. مالهاش حل تاني
    وبعدين زود بانك تقارن بين مطار القاهرة مثلا ومطار الخرطوم الدولي شوف انت بقى !!

    =============================
    لاعب النرد:
    الدنمركيين بيقولوا على مطار فرانكفورت زبالة😦
    انا شخصيا جالي ذهول لما شفته

    تنزل بالأسانسير لمحطة القطر .. !!! دي حاجة عظيمة جدا

  19. bluestone says:

    Hamed Ibrahim:
    انا بتهرب من اي فرح مش مضطرة احضره
    بس لما بحضر بقرر بارادة خالصة اني هبسط نفسي بشتى الطرق عشان مايبقاش يوم وراح على الفاضي

    الناس اللي بتسألك فعلا يا اما سخيفة زيادة
    يا اما هم اتجوزوا كده
    اول واحد معدي ع الباب
    واول واحدة شافوها في الشارع ..

    لو الواحد قليل الذوق شوية
    كان رد عليهم الرد المثالي

    (وانت مال أهلك)

  20. bluestone says:

    sinper:
    عارفة فيه ناس بتكره الافراح فعلا

    “Before 2002 Cairo International firmly resided between the shitty cheeks of Satan’s ass.” (Neil Ross)

    هو ده احساس مظبوط لانك في مطار القاهرة انت مش عارف رايح فين ولا جاي منين ومين بيروح فين
    مفيش اي اشارة تدلك على اي شيء

    =================================
    حفصة:
    ما هو لازم تضحي
    يعني تروحي مطار كويس وكمان تركبي على شركة طيران محترمة

    لأ لأ اسمحيلي

    ايه الطمع ده؟؟

  21. bluestone says:

    اينوسنت:
    بس بيني وبينك
    اللي يشوف بلاد غيره تهون عليه بلوته
    قصدي بلدته
    ده كلام مجرب مؤخرا🙂

    بس هي فعلا بقت عنيفة شوية مع ولادها اليومين دول
    =================================
    اكتب بالرصاص:
    انا الحقيقة مجربتش مطار اسكندرية خالص
    بس قادرة اتخيل طبعا😦

    ===============================
    مايكل:
    الله يخليك
    وبناء على توجيهات صاحبة المدونة نتقدم لك بأسمى آيات الشكر :)))))

  22. bluestone says:

    آبي:
    لا الطيارين المصريين
    دول سمعتهم عالمية
    افضل طيارين وتحسيها في الاقلاع والهبوط
    في اي شركة طيران في العالم

    ==================================

  23. bluestone says:

    رشا:
    يعني عايزة تقنعيني مانزلتيش القاهرة ولا مرة واحدة يا بنت عب رازق؟؟!!

    انا في القاهرة والقهاوي يا مكترها
    وانتي وحشاني بغباوة
    مش عارفة يبقى ده ازاي يا رشا؟؟؟
    =======
    لا بس الكلمة دي جديدة خالص
    تصعبات كده مرة واحدة ؟؟؟
    🙂
    مشكلة الناس انهم بيحطوا بعض في قوالب وبيتصرفوا معاهم على هذا الاساس
    عشان كده بينصدموا في حاجات كتير

    ماتزعليش!!
    انا لو منك اقولها
    وانتي شايفاني يا ولية بقطع في هدومي ؟؟؟!!!

    نهايته
    هتنزلي مصر امتى؟؟؟؟
    ولا آجي أصيف عندكواا؟؟؟؟؟؟؟؟؟؟؟؟؟؟

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s