سمعني سلام عظيمة يا مصر

Posted: 13/11/2008 in Uncategorized

تنويه:هذه التدوينة قد تحتوي على بعض العنصرية
او كثير من التسامح

عدت قبل أيام من الأردن .. المملكة الاردنية الهاشمية .. واليكم ما قد كان.. التدوينة بالعامية المصري والتي هي
so sexy
على حد وصف صديقات من الاردن وفلسطين

اكره الشعارات جدا ومش بحب ابدا اغلب الاغاني الوطنية خصوصا الجديد منها ولا طبعا الشعارات من عينة
مصر أمنا ونيلها جوا دمي وهي ام الدنيا واعظم دول المنطقة ودولة محورية إلي آخره من الكلام اللي الاعلام المصري حشى دماغنا بيه

ولهذا السبب في الكلام اللي جاي مش هتلاقي اي شعارات .. مجرد انطباعات واحاسيس حقيقية ربما تجدها غريبة شوية لكني اؤكد لك قارئي الكريم وصديقي اللي معدي واللي جاي غلط ع المدونة انك لو اتحطيت في موقف مشابه ستشعر مثلي تماما

الانطلاقة:::طيران الملكية….. معايير مُلك خالص

“تعلن شركة الخطوط الملكية الاردنية عن انطلاق رحلتها المتجهة الي العاصمة عمان”ا ده كان النداء الأخير بينما كنا صديقيَ وانا نحتسي القهوة في ستاربكس المطار
تحركنا فور سماع النداء واتجهنا إلى البوابة المخصصة
واستقبلنا موظف الخطوط الجوية بتكشيرة أردني أصلي ثم أمطرنا ببضعة عبارات سمجة عن تعود المصريين على التأخير وعدم احترامهم لقيمة الوقت


ماشي يا بني آدمين ..هي المعاملة كده من الأول!!!!ا

المهم توجهنا إلى الطائرة وطلعنا وقعدنا ولم يستقبلنا بابتسامة سوى المضيفة السريلانكية
الطيارة ميعادها يا محترمين كان 11 صباحا بحسب التوقيت المحلي لمدينة القاهرة لكن يظهر ان الملكية الاردنية كان ليها رأي تاني

الساعة 11 ونصف اعلن الطيار ان الرحلة ستتأخر. لا قال قد ايه ولا ليه؟!!!! بعد مرور نص ساعة على ميعاد الاقلاع ثم الساعة 12 و10 أعلن الطيار ان الطيارة فيها عطل فني وهيبعتوا يجيبوا قطع الغيار من عمان

يعني ننزل وناخد الاتوبيس (قصدي الطيارة) اللي بعدها وقد كان .. وفي الساعة الخامسة مساء!!!! ..أي نعم الخامسة مساء .. كان موعد الطائرة الاردنية الثانية. تخيل عزيزي القارئ المعتاد واللي معدي هنا صدفة تقعد في مطار القاهرة من الساعة 10 صباحا وحتى الخامسة مساء على كرسي مرييييييييييح خالص !!!ا

أنت في الاردن … فين بقى الاردنيين؟؟؟:ا

ركبنا تاكسي واكتشفنا ان السائق لا يسمع إلا الست ام كلثوم
كل سائقي التاكسي في الاردن فلسطينيين تقريبا
-نزلنا في فندق في مدينة العقبة لا يعمل به سوى المصريين

-كل الكافيهات والمطاعم اللي اكلنا فيها لا يعمل بها سوى مصريين

واجب مصري:ا

-احد الفنادق اللي نزلنا فيها مكانش فيها تكييف خالص .. ولما سألنا الموظفين قالوا لنا معلش عطلان بس الجدع محمود اللي كان بينضف الاوض من الفيوم قاللي ان صاحب الفندق بخيل وبيطفي التكييف في الشتا !!!!!!!!!!!!!!ا

يخرب بيوتكوا…. شتا ايه .؟؟ الجو حر طحن … ماقدرناش ننام طول الليل .. ولو فتحت شبابيك الناموس الاردني فيه الخير
وكانت خناقة مع موظفي الاستقبال الكدابين اللي مش بيبتسموا اصلا

وبعد محاولات فاشلة .. لقيت واحد بيخبط على باب اوضتي .. قاللي ان اسمه الاسطى رجب فني تكييف موطنه الاصلي المنصورة قاللي سيبك منهم انتي بلديات وانا هفتحلك التكييف محبة من وراهم

اما بقى في الكافيه فالشباب كانوا جدعان واتوصوا بينا اكل وشرب واتفرجوا على مصري بيظبط مصري من غير ماحد يلاحظ او اتنين مصريين بيلاغوا بعض وفيه “زباين” اشقاء قاعدين حوالينا

يارجالتك يا مصر في الغربة والله

انا من موقعي هذا اتوجه بالشكر العميق لكل من محمود واحمد ورجب عمال تنظيف الغرف والاسطى رجب فني التكييف وشريف وايمن وعبدالله (ابو لسان معووج) عمال البوفيه في مطعم الاوتيل واقول لاحمد وحسين انا سلمتلكوا على مصر زي ما طلبتوا .. وانتوا اجدع ناس واللي يقولكوا غير كده يبقى تيييييييييت

الكورة في ملعب الكبيييييييييير:ا

قريت كلام كتير كتبه صحفيين ومحللين وناشطين بيندموا على ضياع دور مصر الريادي في المنطقة
وان مصر لم تعد اهم دولة في المنطقة وان سياساتها الخارجية خلتها ملطشة .. وان فيه دول تانية بقت اهم

بس الصراحة .. ما سمعته من اردنييين كتييييييير جدا وفلسطينيين مختلف تماما

سواق التاكسي قعد يكلمنا عن السياسة شوية .. وقال احنا مستينييين حركة كبيرة من مصر
“كلنا بننطر (مستنيين) حركة مصر .. مصر تعمل حركة متل 73 ونحنا كلنا وراها”ا
طبعا ما هو المصري قدره دايما يبقى في وش المدفع
“مصر هي الكبيرة وكله في انتظار تحركها”ا

طيب هو يعني مفيش غير المصريين ؟؟؟!!؟ ده انتوا غريبييين خالص .. هو المصري ده مكتوب على سحنته (يضحى بيه لاجل العروبة؟؟؟)ا
طيب وانتوا يا عم الحاج؟؟؟ ده حتى انتوا أقرب
يالا ما علينا

ملاحظات على هامش الزيارة:::::ا

-عدد سكان الاردن تقريبا 7مليون نسمة

-في الاردن مليون مصري يعمل أغلبهم في المهن البسيطة جدا

-في الاردن 2مليون فلسطيني

-اكبر مدن الاردن تلفها في ساعة

-عمان مدينة نضيفة جدا وصغيرة جدا
-سيارات الاجرة تطبق نظام محترم جدا الحساب بعداد الأميال..ياريت نشوفه هنا

-مفيش اي حاجة تعملها للترفيه
-اللي زار مصر ماينفعش يعمل اي حاجة في اي حتة في الاردن
-الدينار بستة جنيه ونص
-عمان فيها عدد 2 مول بس
-عمان مبنية على تلال وكل المباني لون واحد..شكلها لوحة حلوة

-العقبة اكبر من رأس البر بشوية وتزيد عنها كام فندق 5نجوك
واللي يقولك شبه شرم الشيخ يبقى بيسرح بيك او مش عارف حاجة
رد عليه وقوله زي الست شادية (اصله معداش على مصر)ا

-من المعلومات المعروفة جدا والذي تم التحقق منها أن الاردنيين مش بيحبوا المصرييين قوي مش عارفة ليه
-اي اردني من اصل فلسطيني لو قلت له انت اردني يزعل منك

-الاكل في الاردن …..ايه؟ا
-الاردنيين مش بيحبوا يخدموا نفسهم

-الرجل الاردني لا يبتسم إلا لو بيعاكس واحدة في الشارع واحيانا بيعاكس من غير ما يبتسم !!!!!ا
-الرجل الاردني برضه متحرش .. وله نظرة وقحة للمرأة (كلنا في التحرش اشقاء باين)ا


وها قد هبطت طائرة الملكية الاردنية بسلام في مطار القاهرة مساء الاحد الماضي
وقد نزل 3 مصريين يقبلون تراب المطار لحد ما بقهم اتملى تراب

ولتاني مرة سمعوني سلام

عظيمة يا مصر

عمار يا أم المنطقة


Comments
  1. ^ H@fSS@^ says:

    looooooooooooooool
    بوست ظريف من زمان مقريتش حاجة كدا
    بصي يا ستي
    الاردنيين بطبعهم فظين و هما نفسهم عارفين الحكاية دي
    انما ليه بقى فظين متعرفيش
    خلقة ربنا او الصحرا او ايه بالظبط
    متعرفيش

    بالنسبة للتكشير من الموظفين فده فيه منه ف يمصر و قطر و الاردن و اي مكان عربي ببساطة لاننا معندناش حاجة اسمها
    service quality measures
    فكل واحد بيعمل ما بدا له عشان مافيش حد حيقوله انت بتعمل ايه
    ان اموظفة الجوازات في مطار قطر مثلا بترمي الجواز في وشي كاني قطعت التذكرة من مرتبها
    عادي خالص
    مطار مصر و مصر للطيران
    اديكي عارفة و شفتي بنفسك
    دويقة دويقة يعني

    التحرشات اعتقد هي دي الحاجة الوحيدة اللي مشتركة بين العرب
    و ان كان شهادة للحق
    قطر مافيش التحرشات دي
    فيها معاكسات اه
    بس بشكل معين لا يخدش حياء الناس و بالمستخبي كدا لكن اللي بيتحرش بجد يكفي ان البنت تشاور عليه و البوليس بيقوم للواجب اعتقد ده نابع من كون الشرطة هنا لسه ليها هيبة و الناس بتعملها حساب

    بالنسبة لكون المصريين كويسين معاكي ففعلا و احنا برا بيكون مننا كتار ناس كويسين مع بعضها
    ان امنساش الرافتاني و الل يعمله معايا لما كنت في نيويورك
    لكن ده ميمنعش وجود امثله اخرى للمصريين في الخارج اسواء ما يمكن التعامل معاه من البشر

    الاردن بسيطة و ظريفة
    بالنسبة لي مدينة مثالية
    لان ان ايكفيني امشي في شارع نظيف و الهوا يضرب فيا و يلعلني
    يمكن لو كنتي رحتي الجبال و المنتزهات اللي على الجبال كان رايك اتغير
    تحسي قاعدة في جنة على بسيط يعني
    الهوا لوحده يرد روح الف ميت بعد الشر عليكي

    يعني هو ده تعليقي المبدائي و البقية تاتي ان كان فيه

    تحياتشي و اهلا بيكي في ارض الوطن
    يا حبيبتي يا مصر يا مصر
    يا حبيبت يا مصر يا مصر
    يا مصر
    ماشفش الرجالة
    السمر الشداد و هما بيقفشوا في البنات
    لووووووووووووووووول

    باي

  2. هبة ربيع says:

    قالولك العامية المصرية
    so sexy ?!،
    ورديتي عليهم بأيه ؟! ، كده تسيبيهم يتحرشوا بلهجتنا
    :DDDDDDD
    حلوة أوى التدوينة
    في انتظار أني أعرفك أكتر ( يعني اسمك وبتشتغلي فين ، وحاجات زي كده ، ولو ممكن على الإيميل
    hrrahmed@yahoo.com
    تحياتي

  3. karakib says:

    اكيد يا بلوستون
    مصر عظيمة و هاتفضل عظيمة
    يعني تتحب
    بلدنا واللهي جميلة و رغم كل اللي فيها
    احنا شعب جميل و جدع عندنا مشاكل لكن برضه احنا مصريين
    فاكر لما كنا قاعدين و راجل قال لنا مصر لو قارنتوا المثقفين اللي فيها بباقي الدول هتلاقوهم سوبر سوبر مثقفين
    امال احنا بنحبها ليه رغم كل مشاكلها

  4. لاعب النرد says:

    معلش
    لما زرت شرم قبل كام سنة (وانا بزورها كتير) كان معايا انا وصاحبي بنتين صديقاتنا جايات معنا

    الامن المصري اللي بحس نفسه وطني جدا لما يشوف فلسطينيين من مناطق ال 48 الي بحب يسميهم (عرب اسرائيل)ويحب يثبتلهم انه هو كمان عارف انهم خونة, ضل يتنطنط في خلقتنا ويسأل وهو يبتسم في وش واحدة من التنتين “حتخيطو اليومين دول, اه؟” حلوة دي.

    لو اسست انطباعي عن المصريين على التصرف ده, او على عدد المرات الي فيها لوى حد دراعي (مجازيا) علشان ياخد بقشيش او عدد المرات الي فيها دفعت علشان غرفة “سي فيو” وطلعتلي بدالها غرفة “باركينغ فيو” وعدد المرات التي حاول البعض فيها يضحك علي أو اهانني بكلامه وهو قصده يمدحني

    لو اسست انطباعي على الحوادث دي كان منظر مصر حيكون في نظري وحش قوي

    مش كده؟

    بس انا معاكي ان الاردنيين فيهم فظاظة…وهم اصلا بيكرهوا الغريب من منطلقات ال xenophobia

    وبالذات يكرهو الفلسطينيين كبشر ويحبوهم كفكرة, كمبدأ, ككربلاء

  5. 2 B || ! 2 B ® says:

    Hilarious post🙂 yet I hate to see it turn into a racism battle.

    But comeon🙂 it’s a well known fact that Egypt is famous with her people’s kindness, courage and hospitality, and Palestine is…well poor Palestinian people🙂

    At last: Jordan! ummmm tell me if any one heard anything about/from Jordan…el sara7a ma7adesh beyesma3lohom 7es🙂

  6. lastknight says:

    حمد الله على السلامه
    كان لى أعمال مع الأردن فى مجال تصدير الحاصلات الزراعيه .. بافعل الأردنين فيهم فظاظه .. عنصريتهم مع الفلسطينين تبرر أيلول الأسود بوضوح
    لكن لنعتر فعلا أنه ما من بلد عربى سيتحرك مالم تتحرك مصر أولا .. قدر .. نصيب .. دور .. لا أدرى .. لكن فعلا .. فى انهيار مصر ( كما هو الآن ) فالعرب تما فى انهيار .. و مع صعود مصر .. يصعد العرب جميعا .. و لا أشكتكى من ذلك .. بل أراها نفطة فوه يستند لها أى مخلص يتولى قيادة مصر .. فلو تحرك للأمام .. فسيتبعه الجميع
    اشتقت لتعليقاتك عندى

  7. جبهة التهييس الشعبية says:

    قعدت اعيط اعيط اعيط اعيط اعيط اعيط اعيط اعيط وباكتب التعليق وانا باعيط

    الظاهر باتلكك

  8. جبهة التهييس الشعبية says:

    انت عارفة اول ما رجعت من الاردن وظابط الجوازات في مصر ابتسم لي قلت له: الله…وحشتني الضحكة دي قوي وقعدت اعيط برضه

  9. جبهة التهييس الشعبية says:

    اه نسيت اقول لك
    البوست مش عنصري ولا حاجة، هم الاردنيين مش بيضحكوا دي طبيعة، مش عيب فيهم يعني بس هم مش طبيعتهم بسامين، اول ما تلاقي واحد بيضحك لك في الاردن بتعرفي انه فلسطيني وطبعا المصري مش محتاج اي علامات
    يابنتي ده كنت في العمرة اللي فيها امم امم امم بالالافات ونبص في عينين بعض على بعد خمسميت متر نعرف بعض على طول ونروح فاشخين ضبتنا ومش ناقص غير نترمي في حضن بعض ونقعد نعيط

    احنا ما كانلناش البهدلة دي كلها على فكرة
    بس الاردن حلوة، مغسولة بالمية والصابون

    طب اقول لك حاجة
    في الدنمارك، مرة دخلنا مطعم، مطعم دنماركي عادي، واذ بينا نفوجأ بواحد مصري هابب علينا وبيبتسم لنا وبيقول لنا: احنا هنا اللي ماسكين المطبخ ما تقلقوش
    وراح جاب لنا بامية وبسلة بالجزر ورز مفلفل
    :))
    ولما رحت لبنان الراجل بيحط القهوة كان ح يوقعها على صاحبتي لقيت الجرسون المصري بيقول له: ما توقعهاش على اللبنانية، وقعها على المصرية احنا كده حمالين قسية

    بس انا زعلانة منك، انا لما باسمعهم بيقولوا احنا مستنيين مصر واحنا وراها بيصعبوا عليا وبصراحة بافرح انهم عاملين زي مسعود في وجهة نظر: لسة عنده امل فيا

    ههههههههههههه
    اذا كنا احنا ما بقاش عندنا امل في نفسنا

  10. African Doctor says:

    هو فعلاً التكشيرة الأردنية شيء أصيل🙂 أثناء رحلتي الأخيرة إلى عمّان كنت أقرأ مقالاً لأحد الصحافيين الأردنيين يتحدث عن نفس الموضوع الذي لم أكن أعرف عنه شيئاً قبل تلك اللحظة. لكني لاحظته هناك فعلاً…

    هناك فرق ثقافي هام بين المصريين و الأردنيين، نحن أصحاب حضارة زراعية و “بحر متوسطية”، حضارة الأردنيين “بدوية”، و لكلٍّ قيم جميلة و عيوب.
    مثلاً، لاحظت أن فكرتنا عن الاستمتاع بالحياة مثلاً مختلفة. ففي القاهرة المقاهي و القعدات على النيل و “شم الهوا” هي المتعة، بينما المطعم الجيد في عمّان هو من يقدم “منسف” جيد و كثير، و غالباً ما يكون هذا في قاعة مغلقة مكيفة؛ مع أن بعمّان أماكن جميلة للجلوس و الخروج و الأكل.

    الدور المصري الكل ينظر له بترقب في كل البلاد العربية. ترتبات تاريخية؟ قوة ناعمة؟ أوهام القومية؟ لا أستطيع تحديده، و لكن هناك شيئٌ ما مختلف في كونك مصري في بلد عربي… هناك شيئ خاص.

    بعض الأردنيين فعلاً عنصريين تجاه الفلسطينين، و هذه مشكلة حقيقية في المجتمع الأردني لا جدال في ذلك. أما نظرة البعض للمصريين – الذين يعملون في مهن متواضعة – فضايقتني فعلاً و كان لدي نفس انطباعاتك.

    عامةً حمد الله على سلامتك، و اللي يعيش ياما يشوف🙂

  11. بيسوو says:

    كان معايا بنت اردنية في المدرسة وكانت ياللعجب مكروهة جدا…وان جيتي للحق البنت كانت خنيقة بطريقة مستفزة

    عجبتني قوي الحتة بتاعة جدعنة المصريين معاكي دي…فرحتني قوي

    اللي فرحني اكتر بقى ان في خطوط طيران اسوء من خطوط مصر للطيران..هو انا عمري بصراحة ماسافرت فيها بس سمعتها سابقاها وانتي عارفة

    هيييييييه..الحمد لله اتارينا في نعمة واحنا مش حاسيين🙂

  12. Adoosh says:

    معلشّ مرحبا🙂
    أنا وصلت هون بالصدفة, كنت بقرأ عند نوّارة وكانت حاطّة لينك لهالبوست..
    بصفتي أردني, أو بدقّة أكثر فلسطيني اردني, اسمحيلي أعلّق نيابة عن الشعب الأردني الشقيق:
    أوّلاً إحنا عنّا أكثر من مولين😦
    أي نعم الرئيسيات همّ بسّ مكّة مول وسيتي مول, بسّ في غيرهم كثبر كمان مثل عمّان مول, عبدون مول, البركة مول في الصويفية, المختار مول بشارع الجامعة.. وغيرهم.
    مش مهم, هاي بس تصحيح معلومة لا أكثر..

    نيجي للملكيّة الأردنيّة, بصراحة, ومثل ما إنتو بتقولوا: إنت “حظك وحش”🙂 أوّل مرة بسمع عن رحلة للملكية بتتأخّر وبالشكل هاد, مش إنهم أنبيا, الحوادث والأخطاء بتصير في كل مكان, لكن الحالات فرديّة جدّاً, وأنا عم بحكي برضو من تجربة عمرها سنين معهم في سفر شبه متواصل نظراً لطبيعة شُغلي..

    أما الكشرة الأردنيّة, فهاي بالذات فلكلور اردني فلسطيني عريق, تراث يعني, مثل روح النكتة عند المصريين والتكبّر عند الخلايجة🙂

    هلأّ لمّا انت جاية من مصر أكيد حتشوفي الأردن قدّ الكمشة! بلد صغيرة وما عنّا لا نهر ولا بحر (في عمّان يعني) ولإحنا أصلاً بحكم العادة مش اصحاب كيف وسهر وهيك.. وسط البلد بسكّر كلّو الساعة 11 بالليل بالكثير!

    أما بالنسبة للمصريين اللي بشتغلو في الأردن في مهن متواضعة فهو مش شي جديد ومش بس عنا في الأردن, والسبب ببساطة برجع للفرق في مستوى المعيشة بين مصر وهاي البلاد اللي بمكّن المصري من إنو يقبل براتب أقل من الأردني مثلاً في هكذا مهن..
    يعني براتب جرسون مطعم, اللي لا يتجاوز ال 200 دينار أردني, مابتقدري تصرفي على بيت وعيلة نهائياً, بينما نفس المبلغ حوليه لجنيه مصري بعطي تقريباً 1500 جنيه, والباقي عندك! في جرسون في مصر بياخد 1500 جنيه؟

    أنا شكلي رغيت كثر, لا؟

    وللصدفة برضو, أنا بس اليوم راجع من مصر! بعد زيارة استمرّت أسبوع, وان شاء الله حعمل بوست عنها قريباً جداً, يعني
    stay tuned..

    تحياتي🙂

  13. bluestone says:

    حفصة:
    كيفك يا بنتي ليكي وحشة

    التكشيرة قاسم مشترك عند الكل في الاردن
    بس كلام الموظف كان فظ جدا ومش معتاد خصوصا ومعروف ان العاملين في السياحة في اي حتة في الدنيا بيبقى جزء من عملهم اللباقة ومجاملة الزبون

    مطار علياء بعمان مطار صغير جدا ومنظم مقارنة بمطار القاهرة بالتأكيد
    في مطار القاهرة يمكن الوحيد اللي شباك الجوازات فيه متقسم تقسيم طبقي

    دبلوماسيين وناس عادية
    يعني الناس المحترمة
    وباقي البشر

    مع ان في كل الدنيا تقريبا هتلاقي الجوازات للمواطنين من ابناء البلد
    والاجانب

  14. bluestone says:

    هبة ربيع:
    آه شفتي وانا سبتهم
    معلش ماهو تبقى حاجة مصرية سو سكسي

    بيقولوا على اللهجة المصرية فيها دلع ومزيكا
    !!!!
    مع انهم مايعرفوش رجالتنا بيقولوا ايه على اللبنانيات واللهجة اللبناني

    حقيقي لا كرامة لواحدة ست في بلدها
    🙂

    اسمي ؟؟ وبشتغل فين ؟؟؟
    انتي رتبتك ايه ؟؟؟
    :))))
    بضحك معاكي
    تقريبا كل الناس عارفة اسمي
    انا اصلي خايبة قوي في مسائل التخفي الالكتروني دي

  15. bluestone says:

    كغاكيب:
    بعيد عن منظورك الوردي اللي بيرفعلي الضغط
    فعلا هي فيها حاجات كويسة

    بس المصريين على ده كله اتغيروا برضه كتيييير
    احنا كنا انضف من كده بكتير
    بس الحوجة والقرف والفقر وكتر القهر وتخلف العلم والتعليم
    وسيطرة الهوس الديني على دماغ الناس بوظنا شوية

    احنا بنحبها من غير سبب يابني
    احنا ربنا يكون في عونا
    على رأي عبد الرحمن
    الحياة في مصر نوع من الجهاد

    احنا بنحبها بدون سبب

  16. bluestone says:

    لاعب النرد:
    انا مافهمتش تعليق الراجل معناه
    بس استنتجت انه حاجة وحشة ؟؟

    انا عارفة حساسية المصريين او انطباعهم الخاطئ عن عرب48
    بس اللي انا بتكلم فيه هو انطباع عام عن الناس كلها
    فاهم قصدي عن الشعب كله

    اكيد حقك تكون عن مصر اي انطباع
    لان في النهاية هي انطباعات فردية لان تجربة السفر هي بالاساس تجربة فردية برضه

    انا سمعت كتير انهم عندهم مشكلة مع المصريين تحديدا بس مش عارفة ليه

    سواق فلسطيني ركبنا معاه التاكسي واحنا رايحين لمطار عمان
    قاللي ان الفلسطينيين في الاردن بيحاولوا ينفوا فكرة انهم بيشعروا باعتزاز كونهم فلسطينيين وبيرفضوا الاشارة لانهم اردنيين لان ده بيزعل الاردنيين جدا
    وهم بيحاولوا يندمجوا
    في المجتمع الاردني ودي مسألة صعبة بالنسبة لهم جدا

  17. bluestone says:

    2 B || ! 2 B ®:
    مش عنصرية ولا حاجة بس فعلا زي ما انت بتقول يمكن عشان احنا مشهورين باننا مضيافين او اونطجية حتى
    لسانا حلو زي ما بيقولوا
    ويمكن فعلا اختلاف الثقافة
    الله اعلم

  18. bluestone says:

    last knight:
    صحيح .. بس هو قدرك ده دايما يخليك في وش المدفع يعني
    ماهم بينهم وبين عدوهم التقليدي زي ما بيقولوا كام متر
    لازم احنا نيجي عن طريق صلاح سالم يعني ؟!!

    وبعدين احنا منهارين زي ما انت بتقول
    يعني البلاوي اللي جوا تكفينا 50 سنة قدام
    لما نبقى نظبط نفسينا نبقى نفوق للجيران

    بس بيني وبينك الاحساس بمكانة خاصة كمصري في دولة عربية برضه مختلف

  19. bluestone says:

    جبهة:
    تعيطي ليه بس يا حاجة
    ربنا مايجيب عياط

    انتي انفعالية موت وده خطر على صحتك
    شوفي مين اللي بينصحك اساسا :))

    انا قلت لصاحبتي في مطار القاهرة واحنا داخلين .. قبل ما ندخل على الجوازات وانا عمالة اقولها مصر هي امي وياخلاوة مصر يا ولاد
    قالت لي اتنيلي لما نشوف هنقف قد ايه في الجوازات
    بس الاكادة البيه الظابط عدانا عادي
    وابتسم

    والنعمة ابتسم
    وقاللي حمد لله ع السلامة :)))
    دي حاجة عظيمة جدا
    نادرة من نوادر الزي الرسمي يعني🙂

    ————–
    لاااا المصرييين بيتعرفوا على طول
    كنتي تعالي اتفرجي على الاونطة بتاعة الجرسون المصري وهو بيحسس الزبون انه فعلا واخد اعظم وافظع حاجة في المحل
    انه واخد طلب خصوصي

    احنا ملوك في الاونطة .. كله لاكل العيش

    في الدنمرك دخلنا اكلنا في مطعم كان صاحبه مصري
    فاتح 3 محال منها واحد في فيصل

    بيني وبينك الاكل كان وحش قوي
    بس انا انبريت وانفردت وقلت الاكل عظيم
    واللي هيفتح بوقه هديه على حنطور عينه

    مطعم مصري في نصف الكرة الشمالي في قلب كوبنهاجن العظيمة وبيفتح متأخر وكل كتاكيت الدنمرك نايمة🙂
    صيع يعني

    هيهيهيهيهيهيهيهيهي
    ماهو مسعود ده خلاص فقد الامل

    لسه بقول لفارس اخير
    زي ماقلت لهم برضه
    احنا فينا اللي مكفينا يا جماعة

    هو احنا مكتوب علينا نضحي
    واحنا نضحي بالبني آدمين
    والباقي بالزيت والفلوس

    مش حرام بقى ولا ايه ؟؟؟؟
    احنا عندنا بلاوينا

    والمثل المصري بيقول ايه….

    اللي يعوذه البيت يا اختشي يحرم ع الجامع
    والكنيسة
    والدول الشقيقة
    والقضايا القومية
    والعربية

  20. bluestone says:

    الطبيب الافريقي:

    انت دلوقتي بقيت طبيب افريقي رويال🙂
    حاجة ملوكي يعني :))

    مبروك تاني مرة اوتالت

    اغرب حاجة ان الراجل قعد يوبخنا على المواعيد ودي مش شغلته يعني عيب وهو شغال في السياحة يتكلم كده مع الناس

    ده غير التكشيرة طبعا
    يعني حتى الظابط بتاع الجوازات الاردني كان زوق جدا بصراحة

    قاللي اتفضلي ستي وبتاع
    بس برضه مكشر
    طيب ياعم الحاج مين زعلك بس ؟؟
    —————————–
    يمكن عشان احنا مشهورين بقدرتنا المعجزية على الاحتفاظ بروح النكتة في اسوأ واحلك الظروف
    زي اللي احنا عايشينها دي بالظلبط

    —————

    متفقة معاك تماما
    هناك احساس خاص جدا لكونك مصري في بلد عربية
    ربما لا يحبك اهل هذه البلد ولكنهم يشعرون نحوك بشئ ما .. ترقب..احترام.. اعجاب
    مش عارفة بالظبط بس هو احساس مختلف

    الله يسلمك يا دكتور🙂

  21. bluestone says:

    بيسو:
    هي مسكينة طبعا
    الطبع الناشف بين المصريين صعب

    —————————
    صديق خواجة عايش في مصر بقاله كام سنة قاللي انه لف اغلب الدول العربية

    كنت قاعدة بشتكيله من الهوسة اللي مصر
    تلوث
    زحمة
    قلة انضباط
    قلة نضافة
    وش ومعاملات حكومية مش عارفة

    قاللي حاجة مافهمتاش الا لما سافرت دولة عربية تانية
    قاللي “انتي بتقارني مصر بمين ؟؟ بأوروبا؟ ولا أمريكا؟ تبقي غلطانة
    قارني مصر بجيرانها..هتكتشفي انها فعلا كويسة جدا)
    ا

  22. bluestone says:

    adoosh:
    يامراحب يا مراحب

    ليه معلش
    انا ماشفتش اللينك عند نواره

    خليك دقيق
    اردني غير فلسطيني اردني عشان انتوا اللي بتزعلوا🙂

    انا شفت البركة مول
    هو ده مول يا راجل برضه !! يالا مش مشكلة
    وبعدين انتوا بلدكوا غالية طحن يا راجل
    انا اكل ساندوتش كنتاكي ب50 جنيه لييييييييه
    ————
    يمكن حظي وحش مع الملكية
    معلش احنا جمهورية من زمان ويمكن بختنا مش ملوكي خالص🙂
    هي فعلا الطيارة التانية كانت والشهادة لله كويسة ونضيفة
    بس قعدوا يذيعوا في برنامج كوميدي زي الكاميرا الخفية خلاني كنت عايزة انط من الشباك ياعمي والله
    حاجة فظيعة

    التكشيرة مش فلكلور فلسطيني
    الفلسطينيين ياعم بيضحكوا وعادي
    انا عرفت سواق التاكسي اللي جابني على المطار من ابتسامته كل شوية

    قلت لصاحبتي شاكله فلسطيني
    على فكرة هو أخد مني
    25 دينار من مكة مول
    يبقى كتير ده ولا ايه؟؟

    انا حسيت انه كتير؟؟

    ———–
    بلاش خلايجة في الحوار الكويس ده بقى
    ماتلخبطش الدنيا على بعض
    عشان اليومين دول عندي حساسية من الاخوة في السعودية وزعلانة شويتين

    ——————–
    يعني ايه الكمشة؟؟؟
    كلمة كويسة دي ولا ايه ؟؟

    اه صحيح .. انتوا بتناموا بدري قوي !!!!

    ——–
    ممكن المصري يشتغل في مهنة بسيطة
    في اي بلد نتيجة للفروق الاقتصادية زي ما بتقول
    مفيش مشكلة
    اكل عيش بقى

    وده مش عيب

    العيب الحقيقي
    هو النظرة الدونية ليهم
    ومعاملتهم على انهم خدم
    او الاستعلاء عليهم

    فهمت علي🙂
    فاهم قصدي يعني

    وبعدين فعلا الاردنيين مش بيحبوا يخدموا نفسهم خالص .. ليه؟

    مارغيتش ولا حاجة

    دي قهوة ياعمي يعني الرغي مسموح
    وصاحبتها اصلا رغاية

    مستنيين البوست اللي عن مصر
    وشكلها هيبقى الدم للركب :))))))))

    منور
    والمشاريب على حسابنا

  23. م/ الحسيني لزومي says:

    من اجل مصر
    شارك في الحملة الشعبية للقيد بالجداول الانتخابية وادعو غيرك
    ضع بنر الحملة علي مدونتك
    البنر موجود علي مدونتي
    ارسل ميلك اذا كنت ترغب في وضع البنر نرسل لك كود البنر

  24. Adoosh says:

    كمشة يعني حتّة صغيرة🙂

    البركة مول لسّة تحت الإنشاء, وبكلّ الأحوال مابصير تقارني ب سيتي ستارز, هاد عندو طفرة جينيّة وإفراط نموّ
    😀

    غلا الأسعار نسبي, يعني بالنسبة إلي مصر رخيصة جدددددداً, سندوتش الطعمية أبو نص جنيه في الحسين خلاني أضحك أسبوع, عنا أرخص سندوتش طعمية ب 3 جنيه..
    وهاالحكي برجعنا لنقطة ليش المصريين عنا بشتغلوا في مهن متواضعة وراتبها ضعيف مقارنة بتكاليف المعيشة في الأردن..

    أما موضوع النظرة الدونية للعمال المصريين, فهو أوّل شي حالات فردية تعبّر عن نفسها فقط, يعني الحكاية مش حكاية إنو الشعب الأردني بكره الشعب المصري, أبداً والله..
    جزء من الناس بنظر للموضوع من زاوية أهل البلد مقابل الوافدين, وجزء تاني بنظرله من زاوية إنو العمال المصريين وغير المصريين عم بشتغلو عنّا بينما أهل البلد مش لاقيين, يعني عنا نسبة بطالة في الأردن بحدود العشرين في المية وفي المقابل عنا أكثر من 200 ألف عامل مصري في كل القطاعات!
    ع العموم الموضوع جداً متشابك..

    —————
    تكسي في عمان ب 25 دينار مستحيل رسمي, ثامن المستحيلات! باستثناء إذا كان تكسي مطار متخصص وأخدك من أو إلى المطار, في هاي الحالة بكون ناصب عليكي شوي بسّ🙂
    —————–
    بنحبش نخدم نفسنا؟ لأ أبداً يا بيه ماحصلش🙂

    هاد الحكي بنطبق تماماً ع الخلايجة مش علينا, وبرضو بعتمد ع الأماكن اللي انت رحتيها.. مش كل الأردن زي بعضها ولا حتى كل عمّان زي بعضها..
    ————–
    أوكيه ماشي, والغدا علينا.. عاملين منسف مع راس خروف, حاجة أردني أوريجينال خاااالص
    😀

  25. bluestone says:

    عاااااااااا يعني التاكسي ضحك عليا ؟؟؟؟
    انا عاوز فلوسيييييييي
    ده قاللي انا كارمك كمان

    هو مش تاكسي المطار احنا اخدناه من المول لحد المطار ومكانش معاه عداد

    قاللي يادوب يكفي :(((

    انا موافقة على الغدا تماما لاني مكلتش منسف لما جيت على الاردن

  26. مهندس مصري says:

    بوست جميل
    و حسسني إني لفيت الأردن كلها
    و عرفني عليها بعيون مصرية
    انا عندي في السعودية المصرييين كتير قوي و في كل المهن
    من اول الدكتور و المهندس لحد العامل البسيط
    بس طبعاً الهنود و البنغال و الباكستانيين كثافتهم العددية اكتر مننا بكتير
    🙂
    انا ما شفت هنا في السعودية غير أردني واحد و مش حأقدر أحكم منه عليهم خصوصاً إن معرفتي بيه بسيطة

    سعدت بمعرفتي للمدونة دي
    🙂

  27. Lola says:

    اولا حمدالله على الله على سلامتك..
    وبعدين مش بيقولوا للسفر سبع فوائد..شوفى انتى بقى طلعتى بكاااااااااااام فايده..موضوع ان الأردنين دمهم واقف دى معروفه ودى طبيعه شعوب..انما انا اللى عجبنى اوى انك حسيت هناك بقيمه مصر..تفتكرى لو الحكومه سفرت الشعب كام يوم الأردن حيرجع وهو حاسس بقيمه مصر كده ومشتاق لكل اللى فيها؟؟؟؟؟؟؟ ههههههههههه مش قاده اتخيل حتى ..التدوينه زى العسل بجد

    لولا

  28. bluestone says:

    مهندس مصري:
    اهلا بيك

    سيبك من الاردن
    انت عامل ايه عندكوا؟؟؟
    مهتمة جدا اعرف تأثير اللي بيحصل على المصريين في السعودية ؟؟
    قوللي هي القاعدة هناك تستاهل؟؟
    سعدنا بتشريفك وفي انتظارك
    وربنا يعينكوا
    ================================

  29. bluestone says:

    لولا:
    الله يسلمك
    هي فكرة فعلا نعمل بعثات مصرية حكومية للدول الشقيقة .. الاردن السعودية مش بعيد :)))

  30. مهندس مصري says:

    وا الله مش حأقدر افيدك لإن من مزايا شغلي هنا قلة تعاملي مع السعوديين لدرجة العدم احياناً
    كل شغلي في المكتب و في الموقع و مع المقاول مع اجانب – غير سعوديين يعني – و ده اريح
    لإن الطبيعي في أي خلاف هنا إن السعودي على حق و الأجنبي غلطان

    في نكتة هنا بتقول عسكري سعودي دخل بيقول للضابط في قسم الشرطة : في اتنين متخانقين بره و مقطعين بعض
    قال له الضابط : إحبس الأجنبي فيهم
    قال له : الإتنين أجانب
    قال له : إحبس المصري فيهم
    قال : له الإتنين مصريين
    قال له : احبس المدرس فيهم
    🙂

    القعدة هنا تستاهل طبعاً لإني هنا بآخد 10 اضعاف اللي كنت بآخده كمهندس في الحكومة في مصر فلا مجال للمقارنة
    ايه اللي رماك على المر
    اللي امر منه

  31. بيسان says:

    ليس عنصريا بما يكفي🙂

  32. Geddo Iskandar says:

    بس أنا كان حظي أحسن من كده مع الأردنين … يمكن كانت عينة منتقاه … الله أعلم🙂

  33. مياسي says:

    مرحبا

    الصراحه أنا إمبارح كتبت لك تعليق طويل شويه بس للأسف راح كله:( مش إشكال كمان مرّه:)

    أول شي أنا معك؛ إحنا شعب كشر شوي و يمكن حتى كتير؛ لدرجة إنو أنا و صاحبتي لما نطلع السوق بيكون من نفسنا نشوف حد بيضحك أو حتى بيبتسم؛ الأردنيين نفسهم واعيين لهاد الموضوع لدرجة إنو لما نشوف حد مكشر بنتخوت-نتريق يعني- عليه و بنحكي مالك راسم ال 11-رقم أحد عشر – بين عيونك؛ مش عارفه السبب يمكن الكشره عنا مرتبطه بالهيبه؛ يعني أنا عرفت مصريين و بالنسبه الهم الزلمه المتجهم إجمالا بيبقى دمه تقيل زي ما بيحكو:( ممكن طبيعة بلادنا و صعوبة الحياة شوي في بلد من غير موارد طبيعيه – ومع هيك مرزوقين الحمدلله مش عارفه كيف هي السبب-
    بس أنا مش معك انو الفلسطنيين بيضحكو أكتر؛ هم يمكن طبعهم أسرح شوي بسبب ظروف حياتهم بس في تشابه كتير بين الشخصيه الأردنيه و الفلسطينيه لا يصل لحد التطابق ربما و لكنه موجود بحكم ألف عامل مما لا يتسع المجال لذكره هنا

    بالنسبه للملكيه؛ فغريب فعلا زي ما حكى Adoosh – و هو بالمناسبه مدون زميل من الأردن-لأنو أنا سافرت معهم قبل هيك و خدمات الملكيه منيحه جد؛ بس شكلها هالمره ما زبطتش معاكي؛ يلا خيرها بغيرها؛ إن شالله المره الجايه تكون أحسن

    سأتحدث قليلا عن موضوع الهويه الفلسطينيه-وأنا بالمناسبه أردنيه الأصل و أساسا من الشمال-
    بالنسبه لموضوع الفلسطينين؛ بدءا دعينا نكون متفقين على أن الشأن الفلسطيني معقد في كل البلاد العربيه-عندك لبنان أكبر مثال حيث اندلعت شرارة الحرب الأهليه في السبعينيات بسبب بوسطة عين الرمانه التي كانت تقل فلسطينين- الأردن دونا عن كل البلاد العربيه تحتضن أكبر نسبه من اللاجئين الفلسطينين و تمنحهم جوزات أردنيه؛ وهذا ما لا يحدث في سورية أو لبنان على سبيل المثال؛ مما دعا أحد الفلسطينين اللبنانيين إلى القول:”ما في قدّام الفلسطيني اللبناني إلا أن يموت”!!-

    وضع الفلسطيني في الأردن موضوع شائك جدا لا يتسع المجال لمناقشته هنا؛ وربما مع كل المناقشات يكون من الصعب حتى أن نصل إلى نتيجه واضحه و محدده بشأنه؛ من ملاحظتي الشخصيه؛ الفلسطينيون يعتزون بهويتهم من واقع شعار “حتى لا ننسى”؛ لأن كثيرا منهم قد بدأ يتنبه إلى واقع أن الجيل الثالث أو حتى الرابع من الفلسطينين و الذي نشأ خارج بلده قد بدأ ينسى موضع البلاد؛ نهائيا ؛ و هو في رأيي حق مشروع فلا يجب أن ينسى الإنسان وطنه و حقه في أرضه

    لكي تفهمي الأردن ووضعها يجب أن تنطلقي من واقع أن الأردن بلد “عشائر” في المقام الأول؛ مبدأ “العشيره أو الحاموله” ما زال متبعا و بقوه؛ و ما زالت أحكام الصلح العشائري ساريه إلى الآن في كثير من المواضيع؛ هو نظام قد يحمل إيجابيات في طياته ولكن له سلبيات كأي نظام آخر

    العنصريه إجمالا موجوده عند كل الشعوب؛ حتى داخل البلد الواحد توجد عنصريه لا يمكن إنكارها-في الأردن مثلا توجد عنصريه بين الشمال و الجنوب؛ و هناك ربما نوع من التمييز ضد الفئات الأخرى ولكن هو كما قال Adoosh ربما نوع من التحزب ضد كل ما هو غريب؛ أنا مثلا عرفت مصريين في الغربه و احتككت بهم ؛ وكان انطباعي عنهم أنهم منغلقين على أنفسهم و متحيزين لمصريتهم جدا و لا ينفتحون على الآخر بسهوله؛ فهل ينسحب هذا على كل المصريين؟؟ أترك الإجابه لك:)

    دور مصر في المنطقه لا ينكره اثنان؛ من يجمع مصر و بلاد الشام يجمع قوة عظيمه؛ كلام قديم من زمن صلاح الدين

    أخيرا: التاكسي أخد منك 25 دينار من شارع مكه عالمطار؟؟!!! الله لا يعطيه العافيه فوق تعبه فضحنا!!!

    ملاحظه أولى:تحياتي لك و عذرا للإطاله
    ملاحظة ثانيه: أسلوبك ظريف جدا لدرجة أنو ضحكت فعلا و أنا بقرأ برغم أن التدوينه ممكن فيهاشوية تهزيء إلنا

    صح مالو الأكل الأردني؟ ما عجبك؟؟ ملاحظه ثالثه:

    ملاحظه أخيره: بتمنى تكون اللهجه الأردنيه واضحه و مفهومه و أنا جاهزه لأي توضيح أو ترجمه:) نهارك سعيد

  34. Desert cat says:

    اولا حمد الله على سلامتك
    انا مش سافرت الاردن بس قابلت واحد اردنى فى شغل من حوالى سنة وكام شهر وكانت معاملتة كفيلة انى اكره الاردن بالدول العربية على بعضها

  35. farida says:

    loool
    يعني مره تقولي المطار بيقول لك سافر و ماترجعش تاني يا حمار و مره تقولي عمار يا مصر

    حيرتيني معاكي
    🙂

    حمد الله على السلامه

  36. bluestone says:

    مهندس مصري:
    يابختك انت من القلة المحظوظة في بلاد الزيت
    النكتة رغم سخريتها انما بتوجع قوي😦
    انما ليه المدرس؟؟؟
    على رأي واحد كتب
    يجلدون من يشفيهم
    ويحتقرون من يعلمهم
    =====================================

    بيسان:
    ده انا جالي عليه اعتراضات كتير

    🙂

  37. bluestone says:

    جدو اسكندر:
    معرفش يمكن انا اللي حظي كده😦

  38. bluestone says:

    مياسي:
    مرحبا
    وياهلا فيكي
    واهلا وسهلا كمان
    🙂

    معلش تعبناكوا
    احنا بنقول على اللي مكشر راسم 111 مش 11 بس🙂
    دي حاجة غريبة ان الاردنيين كمان يبقوا عارفين الموضوع ده
    !!
    طبعا اكيد الشخص المتجهم بيبقوا دمه واقف بالتعبير المصري
    خنيق يعني🙂 مش مسألة مرتبطة بالهيبة

    يمكن زي ما قال احد المعقلين الطبيعة البدوية

    اتفق معاكي بشأن الفلسطينيين

    ومتفقة معاكي كمان ان الشأن الفلسطيني معقد في كل حتة
    ومعقد علينا عيشيتنا كمان
    ويمكن الاردن شايلة او شالت اكبر هم للفلسطينيين لانها اكبر جهة تمنحهم هوياتها على ما اعتقد

    احنا يا مصريين كده
    واحنا جوه نسب فيها ونلعن ابوها
    ولما نطلع بره توجعنا ونتحمق لها🙂

    معرفش طبعا ان كان انغلاق المصريين في الخارج ينسحب على كل المصريين ولا لأ
    يمكن بحسب نسبة تمسكهم بهويتهم او بجذورهم
    وده موضوع شائك ابن كلب يستدعي تدوينات ضخمة للنقاش فيه

    ——
    دلوقتي انا ليا في ذمة الاردنيين
    أكلة منسف
    وباقي حق التاكسي
    وانا من مزنقي هذا بارفع شعار
    (حتى لا أنسى) :))))
    ————
    بالنسبة للاطالة
    مفيش داعي لاي اعتذار
    صاحبة المدونة اللي هو انا بتعلن انها رغاية والاطالة دي حاجة عادية
    جدا🙂

    مفيش تهزيق ولا حاجة
    دي مجرد ملاحظات فردية
    بس واضح ان في بعضها متفق معي فيها
    احنا بنحب ننكت على كل حاجة
    وبعدين اظن لازم تغفريلي بما انك اردنية أصيلة وضحكتي وكانت التدوينة سبب في اضحاكك
    ———————
    الاكل الاردني:: انا ما اكلت طول الرحلة إلا حمص وعيش وزعتر
    في الاغلب
    وشوية سمك في مطعم كان الشيف بتاعه مصري

    و—————–
    اللهجة واضحة طبعا ..🙂 وانا فهمت عليكي منيح :)))

  39. أُكتب بالرصاص says:

    أسمحيلي اختلف معاكي في أكثر من نقطة

    اكتشفت ان معاملة الاردنيين في غاية الشياكة واللباقة
    لدرجة اني ضربت صحوبية مع اكثر من شخص في الشارع لمجرد سؤالهم عن مكان او استفسار عن شيء

    مع ابتسامة هادئة

    ثانيا
    طيران الملكية الاردنية رائع من ناحية النظافة والخدمة والمواعيد

    حتى بدون مقارنة مع مصر للطيران التي هي أصلا خارج المنافسة

    ارتحت كثيرا في الاردن
    واستمتعت بكل المزارات

    ولنا عودة

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s